Chakma ten kum tling lo inneih phalsakna dan an neih tha an tih loh thu thlen
Chawngte tlawha zin Women & Child Development Department Director leh a thawhpui te hian niminpiah khan CADC Chief Executive Member (CEM) chu a pisa-ah kawmin Chakma Customary Law Code, 1997 hnuaia Chakma hmeichhia leh naupangte dinhmun chhe lutuk chu ennawn turin an ngen a, ram danpui kalha Chakma hnam danin kumtling lo inneih a phalsak chu tha lo an tih thu leh a rang thei ang bera siam tha (amend) turin an ngen a ni.
WCD Director hian Chawngte ICDS Project hnuaia buatsaih Awareness on Mission Shakti Programme pawh hmanpuiin Mission Shakti hnuaia hmeichhe dinhmun chawikanna leh venhimna Scheme hrang hrangte a sawifiah a, sawrkarin hmeichhia leh naupangte tana Scheme tha tak tak a ruahman te chu ngaihvena chhawr tangkai turin kalkhawmte a chah a. Chawngte Block-in an mamawh hmeichhe harsatna tawkte tlukluhna tur, One Stop Centre (OSC) chu sawrkar laipuiin pe turin ruahmanna a siam mek thu a sawi a. One Stop Centre hman tangkai thiam a tul rualin, mamawh loa awm chu thil tha ber anih thu a sawi a, chumi atana tan la turin kalkhawmte a chah nghal bawk.
Women & Child Development Department hotute hian CADC Art & Culture Hall-ah CADC hnuaia Department hrang hranga Officer, Village Council Members leh khawtlang hruaitute nen hmeichhia leh naupangte hmasawnna leh venhimna chungchang an sawiho nghal a ni.