Central Ministry hotute hnenah Mizoram mamawh thlen
LESDE Minister Lalnghinglova Hmar leh Ministry of Skill Development & Entrepreneurship (MSDE) Secretary Debashree Mukherjee-i hi Kaushal Bhawan-a Secretary Office-ah inkawmin MSDE hnuaia Scheme hrang hrang, a bikin ITI tihhmasawnna tur Scheme lian PM-SETU leh Skill Development Scheme PMKVY-a Mizoram dinhmun an thlirdun a, chak zawka hmalak dan tur leh harsatna awmte chinfel dan tur sawidunin ruahmanna an siam nghal a ni. Mizoram Sawrkarin MSDE Scheme hnuaia Sports Training kalpuina tur proposal a thehluh tawh pawh an sawidun nghal a. LESDE Minister chuan, “Minister ka nih tirh atangin Sports-ah nasa zawka Skill Training kalpui a tul zia ka tlangaupui a. Sports Ministry-ah pawisa a tam lo a, Sports chu Skill a nih tho bawk avangin Skill Development Ministry-ah kum 2024-ah proposal kan thehlut. India in Olympic Games 2036 thlen a tum avangin infiammite mai bakah Coach te pawh training pek a tul tawh takzet a ni,” tiin Sports leh Skill Development kaihkawpna tura Mizoram Sawrkar proposal thehluh chu tihhlawhtlin a pawimawh thu a sawi a. MSDE Secretary pawhin Mizoram Sawrkar rawtna chu an zirchiang tawh tih sawiin, MSDE Scheme phal chin mila her remin, a theih chin chinah hma a lakpui ngei tur thu Minister a lo hrilh a ni.
Sports Minister ni bawk Lalnghinglova Hmar hian Ministry of Youth Affairs & Sports (MYAS)-a Joint Secretary (Khelo India) Vineel Krishna pawh kawmin, Medal tamna leh Mizote tana hmabak eng bik Sports discipline-ah chak zawka hmalak dan tur ruahmanna an siam a. Mizoram Sawrkar in hmathlir mumal tak neiin Sports a kalpui thu leh Central sawrkar bakah Corporate leh vantlang nen pawh thawhhona tha an nei a, rah a chhuah mek tih Minister chuan a sawi a. Joint Secretary pawhin Sports-a Mizoram hmalaknate chu lawmawm a tih thu lo sawiin, Empowering Mizoram Sports an lo hmelhriat tih a sawi a. Sports discipline thlanbîk neih chungchanga Ministry duh dante an sawidun bawk.
Lalnghinglova Hmar hian Hotel Ashok, New Delhi-ah Mizoram invest duh company aiawhte nen 'Business Interaction' neiin Mizoram hmasawnna tura thawhho theih dan an sawiho a. He hunah hian Company leh Institution aiawh telin, Mizorama invest tura hmathlir an neihte Minister hmaah an chhawpchhuak a. Minister chuan proposal-te chu zirchiana ngaihtuah a nih tur thu sawiin, Mizoram chu ralkhat atanga thlir mai lova, a hmun ngeia zirchianga proposal siam turin a sawm a ni.