Bana Kaih-ah Loan cheng nuai 4,871 pe tawh

Mizoram sawrkar Flagship Programme ‘Bana Kaih Scheme’ hnuaiah mi 524 hnenah Bank-ten Loan cheng nuai 4,871 an pechhuak tawh a, Loan rul tha lo (Non Performing Assets) awm lovin Bana Kaih Phase-III hnuaiah Foreign-a hna thawh tumte tan Loan pung awm lo ruahman mek a ni.
Akashvani News Aizawl zawhna chhangin Adviser to CM (Handholding) Dr. KC. Lalmalsawmzauva, Mizoram State Policy Coordination Committee (MSPCC)-a Vice Chairman ni bawk chuan, Bana Kaih Scheme Phase-I atanga Phase-III kal mekah Bank-ten Progress Partner atana thlan mi 524 hnenah Loan Rs. 4,871, 60,824 an pe tawh tih a sawi a; Loan pek tura thlante hi Loan rul thei ngei tura project nei thate leh hma la thei ngei tura ngaihte an ni a, Phase-I atanga tun thlengin Bank-ten Bana Kaih kaltlanga loan an pek tawh zingah loan rul tha lo, Non-Performing Asset (NPA) an la awm lo a, a lawmawm takzet a ni, a ti.

Bana Kaih Scheme hnuaia Loan Component bikah Progress Partner hi Aizawl District-ah tam berin mi 201 an awm a, a tlem berna Lawngtlai District-ah mi 11 an awm thung a. Implementing Department 15 hnuaiah Progress partner-ten Loan hmu tawhin, Commerce & Industries Department-in Progress partner 129 neiin an ngah ber a; PMEGP Scheme hnuaia loan pek 175 awm tawhin an tam ber bawk a. Mizoram Rural Bank-in Progress partner 337 hnenah loan pe tawhin loan pe tam ber an ni bawk.

Bana Kaih Scheme Phase-III ah hian Foreign a hnathawh tur hmu, engagement hmu tawh si, sum harsatna avanga kalna tur pawisa nei lo te tan sawrkarin Foreign Placement Loan an ruahman mek tih  Dr. KC. Lalmalsawmzauva chuan a sawi bawk a ni.