Leimin venna ah Science thiamna hman tul ti

Disaster Management and Rehabilitation Minister Prof. Lalnilawma’n Mizorama leimin hlauhawm laka inven nan zirbingna chu Science thiamna hmanga kalpui a tul thu a sawi.

Zirtawpni khan New Delhi-a Mizoram House-ah NBCC (India) Limited Chairman leh Managing Director Dr. K. P. Mahadevaswamy nen inkawm leimin laka invenna leh chhiatrupna dawl zo ruhrel din leh siamthat dan kawnga thawhho dan tur an sawi a, Prof. Lalnilawma chuan Mizoram-ah a bikin Furpui laia lei a min fo thin thu sawiin, lei min hlauhawm laka invenna atan science thiamna hmanga zirchianna kalpui tul a tih thu te, hun lo la kal zel tur atan lirnghing leh chhiatna lo thleng thei thlirlawka hmalak a tul thu te, chhiatna thlen hnu-a siam thar tum ai chuan inven lawk dan tur ngaihtuah a, inbuatsaihna tha tak kalpui a tul thu te a sawi a. Mihring nunna leh infrastructure pawimawh te humhim chu State-in a ngai pawimawh tih a sawi bawk a ni.

Minister chuan NBCC Technical leh Engineering lama thiamna hmangin lei min theihna hmun hriatchian, leilung dinhmun leh lei ngheh zawng zirchian, lei min hlauhawmna hmun thlanchhuah leh a hmachhawn dan tur ruahmanna siam chungchang te a sawipui bawk a ni.