Assam Rifles chhuahsan ram hmang tangkai tura hmalakna Minister-in tha thawkhat a ti

UD&PA Department changtu Minister K. Sapdanga chuan Aizawl-a Assam Rifles chhuahsan ram hmang tangkai tura sawrkar hmalakna te a tha thawkhat hle niin a sawi.
Urban Development & Poverty Alleviation Minister K. Sapdanga hian Inrinni khan Aizawl khawpui laili a awm Assam Rifles in an chhuahsan tak ram hmang tangkai tura sawrkar hmalakna te a tlawh a. Assam Rifles chhuahsan ram hman tangkai dan turah ruahmanna (Master Plan) fel tak siam lawk vek a nih thu sawiin, “Hnathawktu ten kan mitthlaa kan hmuh dan aiin hna an lo thawk nasa a, a lawmawm hle a ni,” a ti a. Khaw chhiat avangin duh angin hna a kal chak theih loh thu sawiin, ruah a ban deuh tawh avangin October thla atang chuan hei aia chak zawka hna thawh theih beisei a nih thu a sawi.

UD&PA Minister chuan Lammual hnuaia By-pass road siam mek pawh tluang taka thawh a nih thu sawiin, he hmunah hian mipuite tana tangkai tur hmunhma hrang hrang awm dawnin, thing uihawm tak takte chu a theih chen chenah zuah hram tum a nih thu a sawi a; amaherawhchu, mipuiten an mamawh em em kawngpui erawh siam ngei a ngai tih a sawi bawk a. “Treasury Square leh Bazar Bungkawn inkarah motor riah phal a ni tawh dawn lova, mipuite tana hman tur Parking lian tak tak siam a ni ang,” tiin Sipai In hlui, Quarter Guard building erawh chu thiah lova humhalh a nih tur thu a sawi bawk a. Sawrkar hmalakna leh hnathawktute sulhnu chu hmuh a nuamin a hlimawm hle tih pawh a sawi bakah hnathawh kalphungte thlithlaiin a khat tawka tlawh zeuh zeuh a tum thu a sawi bawk a ni.

He hunah hian UD&PA Minister hi Land Revenue Minister B. Lalchhanzova bakah PWD, PHE leh UD&PA hotute leh Aizawl Mayor in an tawiawm a. PWD leh PHE hotute atanga thu dawn angin ruahmanna kal mekah he hmunah hian Heritage Court leh Exhibition neihna tur hmunte siam a ni dawn a. Building awm sate chu thawmthat tur niin sak belh ngai te pawh sak a ni bawk ang. Lammual hnuaia By-pass road siam thar hi Post Office bulah lut tanin, Saron Veng BCM Biak In bulah a chhuak dawn a ni. He kawng siam hna hi za a 17 chu thawh zawh tawh a ni a. Hei bakah hian kawngpui zauh hna kalpui mek pawh chhunzawm zel a ni a, hei pawh hi zawhfel thuai beisei a ni bawk.