Thlai thar phurhchhuah nan leh Lo hla deuh te kal nan Mono Rail hman tum
Nimin-a Hnahthial-a ZPM South Tuipui Joint Block Conference a hmanpuinaah he thu hi sawiin Chief Minister Lalduhoma chuan ‘Chief Minister Innovation’ hnuaiah Mono Rail hi kalpui turin hma an la tih sawiin, Thenzawl-a Rubber huan hnaih lamah an ti chhin phawt dawn tih a sawi a, ram tha, kawng awm si lo te thlen zung zungna tur a nih thu a sawi bawk. Chief Minister chuan tunah hian nasa zawka Agriculture Link Road lai turin ruahmanna siam a ni tih pawh sawiin, Thal chho intan turah hian tanin, Hortiiculture leh Agriculture Link Road atan sum dah a nih tawh bakah tunah hian cheng vaibelchhe engemaw zat an pe leh dawn bawk niin a sawi.
Chief Minister chuan ZPM sawrkar in kuthnathawktu te a ngaih pawimawh avangin a tir te atangin thlai chi nga lei a ni tih pawh a sawi a, tunah hian thlai dang lei turin an in ruahman leh mek tih a sawi a, Thlai engemaw zatah thlai luman siam a nih thu te, ran luman te an kalpui thu leh kum khata thar thei thei chi hrang hrangah pawh hmalak a nih thua sawi a, Sangha intodelh tumin tan lak chhoh mek a nih thu a sawi bawk.
Chief Minister chuan Mizoram sawrkar in inkalpawhna a ngaih pawimawh thu pawh sawiin, tunah hian chhak leh thlang zawnga motor kawngpui a kal theih nan hmalak a nih thu a sawi a, Airport siamna tur pawh hmun pahnih-ah ruahman a ni a, Northeast Corridor siam turah NE State pariat tana din ah Chairman a nih thu leh hei hi khawvel dang nena inpawhna tur ngaihtuahtu a ni dawn tih a sawi a, Rel kawng te pawh tih belh zel a ni tur thu a sawi a ni.
He hunah hian Bialtu MLA Jeje Lalpekhlua pawhin thu sawiin, Chief Minister te, Minister te duhsakna avangin South Tuipui Bial chuan hmasawnna tam tak a hmu tawh niin a sawi a, hmuh hmabak engemaw zat a la awm thu sawiin Bial mipuite chu amah tawiawm tlat thin turin a chah bawk.