LRS&WC Minister hovin Review Meeting nei

Land Resources, Soil & Water Conservation Department chuan nimin khan Departmental Quarterly Review Meeting neiin he hun hi an Department changtu Minister, Lalthansanga chuan a telpui a ni.

Directorate of LRS&WC Conference Hall-a Quarterly Review Meeting hi an Department Secretary R. Lalbiakzuala chuan kaihruaiin District Officers pariat te an tel kim thei a, anmahni Bial theuha hmalakna - a bikin Chief Minister Rubber Mission chungchanga an thlen chin leh harsatna tawh te ngaihthlak sak a ni a. Presentation hmanga sawifiah niin Department hnathawh te hlawhtling leh chhenfakawm taka chhawr a nih theih nan Minister hoin a hmunah sawiho nghal vek a ni.

He hunah hian LRS&WC Minister Lalthansanga chuan an Department chuan Mizoram pum a fang tan nia sawiin, tun dinhmunah chuan an Department chu Zoram tan innghahna tlak, rintlak takah miin an ngaih tawh thu a sawi a. Chief Minister Rubber Mission chu kuthnathawktute tana a pawimawh zia, hlawhtling lo thiang loa a ngaih avangin he Review Meeting hi ko a nih thu a sawi bawk.

LRS&WC Minister chuan Rubber chu a bultanna chauh niin Kuhva, Coffee leh Hmunphiah chingtute tan hmachhawp siam zel a ni tih pawh sawiin, Watershed Management pawh LRS&WC Department hna liau liaua a ngaih thu a sawi a. Climate Change a ngaih pawimawh thu pawh sawiin, Department in Carbon Trading a hmalak dan tur te, he Rubber Mission nen hian a inmil thu te a sawi a. Rubber Mission kalpui nasat a rem lohna hmun khawchhak lam, Khawzawl-ah te pawh Coffee chin dan turah hmalak zel a nih thu a sawi bawk.