Serchhip P&E Veng-a lei tlahniam a che thar leh

Kumin July thlaa Serchhip P&E Veng-a lei che chu tunkar tir atang khan a chet leh avangin helai huamchhunga awm te chu hmun him lamah an inthiarchhuak leh a, nimin khan khawtlang huap hnatlang neiin chhawmdawlna hna thawh a ni.
Kumin-a Fur ruahtui tla avang khan Serchhip P&E Veng Lane-II tawp lam, Soil Department ram thlenhma-a mual pakhat chu a tlahniam niin a lang a, helai huamchhunga cheng chhungkaw 7 te chu July 12 khan hmun him lamah thiarchhuah an ni a, amaherawh chu lei hi a chet zui loh hnuah tunhnai ruahsur nasa ah khan helai hmun hi a rawn che thar leh a, tunkar Thawhtanni zan atang khan lei hi che nasa in nimin thleng khan a che zui a, nimin khan helai huamchhunga cheng te hi hmun him lamah thiarchhuah an ni leh ta a ni.

He lei tlahniam huamchhunga In nei te hi K. Lalhmangaihzuala (In ban RCC), J. Lalhmangaihi (RCC), T. Lalrinchhana (RCC), K. Lalruatkimi (Assam Type), Zonunsiama Sailo (RCC), Sapliana (Assam Type) bakah Mizoram UPC Biak In te a ni a, tunhnai ruahsur ah khan kawng hi ft. khat vel zetin a tlahniam leh niin a lang a, helai hmuna cheng te zingah hian In luah zui ngam tawh loh tur te pawh a awm dawn niin a lang a, nimin-a khawtlang huap hnatlang-a thawk te hian bungrua an thiarchhuah bakah kawngpui dung-ah lung vawmin PCC an chhung nghal a, mi 200 vel zet an thawkchhuak a ni.