Serchhip District-a MOVCD- NER Phase 4 kalpui dan thlirletin hmalak zuina tur hrang hrang rel a ni

Nimin khan Serchhip-ah District Level Monitoring Committee (DLMC) for Mission Organic Value Chain Development for North Eastern Region (MOVCD-NER) chu thukhawmin Line Department - Fisheries, Horticulture, ATMA, AH&Vety, Cooperation, Agriculture leh FPC service provider Clover Organic Pvt. Ltd aiawhte an tel a ni.
Serchhip District Bawrhsap Paul L. Khuma kaihhruaia Serchhip DC Meeting Hall-a District Level Monitoring Committee (DLMC) for Mission Organic Value Chain Development for North Eastern Region (MOVCD-NER) thutkhawm ah hian DLMC Member Secretary leh Serchhip District Agriculture Officer (DAO) K. Laltlanmawia hnen atangin Serchhip District-a MOVCD-NER thawh lina (Phase-IV) kalpui mek dante ngaihthlak a ni a, he Scheme kaltlang hian FPC din niin, 75% subsidy leh thildangte hmangin thuamchak thin an ni a; Mizoram-ah tun dinhmunah FPC 41 awm mekin, MOVCD-NER hnuaiah hian thlai thlan bik, Sawhthing, Hmarcha, Aieng te bakah Lakhuihthei leh Sapthei te chin thin a ni. 


He thutkhawm ah hian Tuikum Farmer Producer Company (FPC) te hna thawh vilzui dan tur chungchang leh Sawhthing leh Hmarcha vawnthatna tura Cornerstone Innovation te Project, ‘Integrated Ginger & Chilly Processing Unit’ Thenzawl (Tuikhiang)-a din tur chungchangte rel niin Tuikum Organic FPC ten Collection & Aggregation Centre an din tur te, Khawlailung-a Integrated Pack House sakna tur atana sum ruahman cheng nuai 24.5 leh thlai thar phurhna tur Transport Vehicle (Pik-up) leina tur atana cheng nuai 10 ruahman te dik taka hman a nih theih nana vilzui dan tur te rel niin, District Agriculture Officer (DAO) kaihhruai Monitoring Team din nise, uluk taka vilzui nise an ti a. Tuikum Organic FPC te hian Chhingchhip-ah hmunpui (headquarters) neiin khaw 15 an tuam mek a, chungah chuan farmers 500 awmin Lakhuithei leh Sapthei an ching a ni. 

DLMC chuan Tuikhiang, Thenzawl-a Sawhthing leh Hmarcha vawnthatna tur atana Cornerstone Innovation te Project, ‘Integrated Ginger & Chilly Processing Unit’ din tur chu an pawmpui (approve) bawk a; he technology hi Mizorama hmasa ber tur niin Project Cost hi cheng vbc. 1.85 a ni a, Storage Capacity hi MT 900 niin Processing Capacity hi MT 60 a ni a; Cornerstone Innovation CEO Zosangliana Chhakchhuak chuan kumin November thla velah zawhfel theih an inbeisei thu a sawi a ni.

Sawrkar laipui chuan MOVCD-NER Scheme hi kum 2015-2016 atang khan hmarchhak State te tan a kalpui tan a. Central Sector Scheme niin kuthnathawktute'n hlawk zawk leh awmze nei zawka Organic farming an kalpui theihna tur te, thlai thar sawngbawlna leh hralhna tha zawk a awm theihna turte a hmalakna a ni a. Nimin-a thukhawm hian Serchhip District-a Ginger FPC din a nih ve theih nan chak zawka hmalak an rel bawk a ni.