Serchhip-ah PM-RAHAT Scheme chungchang sawiho

Kawngdung-a chetsualna leh vanduaina tawk ten cheng nuai 1.5 man thleng damdawi In-a cashless-a inenkawlna an dawn theihna tur, PM-RAHAT (Road Accident Victim Hospitalization and Assured Treatment) Scheme chungchang chu nimin khan Serchhip-ah Bawrhsap, Paul L. Khuma hovin sawiho a ni.
PM-RAHAT Scheme hi Ministry of Road Transport & Highways hnuaia hmalakna niin kawngpui-a chetsualna avanga thihna thleng thin tih tlem nan leh ‘Golden Hour’ chhunga enkawlna pek hman a nih theih nana duan a ni a. Chhiat tawh atanga darkar khat chhunga enkawlna dawn hman hian accident avanga thihna 50% a titlem thei nia hriat a ni a, hemi hun chhung hi ‘Golden hour’ tih a ni.

He Scheme hnuaiah hian National Highway, State Road leh khawchhung kawng eng pawha chetsualna tawkte chu chetsualna a thlen atanga ni 7 chhung atan cheng nuai khat leh sing nga (Rs. 150,000) thleng Cashless-in enkawlna pek theih an ni anga. He Scheme hi eDAR (Electronic Detailed Accident Report) platform leh Transaction Management System (TMS 2.0) te nen thlunzawm tur niin damdawi In te senso hi Motor Vehicle Accident Fund (MVAF) atangin pek an ni anga, lirthei chetsualna thlentu chu Insure a nih chuan General Insurance Company te kaltlanga pek tur niin hit-and-run leh insure loh case te chu Deputy Commissioner kaltlangin pek an ni ang.

He thutkhawm ah hian Serchhip District chhunga he Scheme tihhlawhtlin dan tur te, Standard Operating Procedure (SOP) leh mipui hriat-tirna tur Awareness Campaign kalpui dan turte sawiho a ni a, thil fel lo leh harsatna awmte sutkian nan Grievance Redressal Officer atan Serchhip DC Office-a SDO (Sadar) ruat a ni. Serchhip District-ah he Scheme hi hlawhtling taka kalpui a nih theih nan tun thla, September 2026 chhung hian Police leh damdawi In-a thawkte tan bik Training buatsaih tum a ni bawk.