Serchhip-ah Bawrhsap hova NCORD thutkhawm ah ruihhlo dona kawnga hmalakna thlirlet a ni
Serchhip DC Meeting Hall-a thutkhawm hi District Bawrhsap Paul L. Khuma chuan kaihruaiin Serchhip-a Sub-Divisional Police Officer (SDPO) Lalrinzuali tarlan danin Serchhip Police te chuan June 25-a NCORD Meeting leh tun inkarah ruihhlo kaihhnawihah mi 7 manin zu litre 918.5 an man a; BSF te nen Joint Patrolling neiin Lungkawlh (Border area)-ah Heroin hawng 91 zet an man bawk. August thla laihawl atangin zirna In leh hmun hrang hrang-ah Anti-Drug Awareness Campaign neiin mi 1300 chuang an tel a. Capacity Building programme te buatsaihin NCORD hnuaia din Special Investigation Team (SIT) te chuan ruihhlo hluarna hmunah te Joint Patrolling nei thinin, Sunday leh zan tin ruihhlo dapchhuah beihpui an thlak a,vaihlo leh ruihtheih thil dangte do nan zirna In hrang hrangah thla khatah vawi 2 surprise check neih thin niin naupangte zirtirna atan Reel insiamsiak te buatsaih a ni bawk.
Excise Department ten NCORD meeting hmasa leh tun inkarah Heroin gram 0.76 leh Alprazolam gram 90.3 (645 tablets) chu Serchhip-ah an man bawk a. Food and Drugs Administration (FDA) te chuan dan phal loha damdawi hralhchhuak damdawi dawr pahnih te chu an license an suspend sak a, damdawi dawr dang paruk (6) warning pek niin dawr 13 te insawifiah turin ‘Show Cause notice’ an pe bawk.
Ruihhlo do a nih rual hian ruihhlo ngaite chhawmdawl hna thawh reng a ni bawk a. Health department chuan Serchhip District chhunga School hrang hrang 9-ah Vaihlo, Ruihhlo leh HIV chungchangah Awareness Programme an buatsaih a; District Hospital Serchhip-a Doctor te’n District Jail tlawhin mi tang damlo 62 zet enkawlin September atangin thla tinin Jail hi an tlawh dawn a ni. Heng bakah hian Sub-Headquarters YMA Anti-Drug Squads te thawhpuinain zu litre 151, Heroin Hawng 9, Pregabalin strip 72 man ni bawkin, inhnamhnawih mihring 12 leh motor pakhat hren a ni bawk.