School Education Department-a thawktute dinhmun Chief Minister hovin sawiho a ni
Chief Minister Lalduhoma hova Schol Education Department thawktute dinhmun sawihona CM Conference Hall-a neih ah hian School Education Minister Dr. Vanlalthlana leh Education Department Official te, Finance Department leh DP&AR Official-te telin District Education Officer (DEO) leh Sub-Divisional Education Officer (SDEO) post ruak tam lutuk tihziaawm dan sawiho a ni a. Circle Education Officer (CEO)-te Sub-Divisional Education Officer (SDEO)-a an kai chhoh ran theihna tur rawtna (proposal) awm mek chu a rang lama umzui tha an ti a. Mizoram Education Service rawtna (proposal) pawh Council of Ministers Meeting-a chhawpchhuah theih thuai beisei a nih thu tarlan a ni bawk.
He thutkhawm ah hian Zirtirtu dinhmun tlangpui pawh tarlan a ni a, PPP Mode-a School thenkhat kalpui chhoh tur chungchang te, School thenkhat zirlai naupang nei tlem lutukte chhunfin leh tihtawp chungchanga ruahmanna awmte pawh sawiho a ni bawk a. Sawrkar chuan School hrang hranga Zirtirtu hi Primary-ah regular 671 lak phalna a pe tawh a, a tahtawla lak tur niin tun sawrkar kum kal mekah 100 lak phawt tur a ni a. Middle School-ah Zirtirtu Contract 544 lak phalna a pe tawh bawk a, a tahtawla lak tur niin kumin ah hian Zirtirtu 212 lak phalsak an ni bawk a. High School Zirtirtu pawh regular 107 lak phalna pek an ni a, a tahtawl bawka lak tur niin kumin ah hian Zirtirtu 57 lak phalsak an ni tawh a. Hemi ang hian kumin chhunga Zirtirtu lak phal zat hi 369 lai a tling a ni.
Nimin-a thutkhawm ah hian Hindi Education Officer, Adult Education Wing leh Physical Education Wing lama harsatna awmte pawh an sawiho a ni a. Hindi Education Officer hi direct recruitment kalpui a tul nia ngaih a ni bawk.