Sawrkar langtlang leh thianghlim din an duh avangin rang takin Lokayukta an thuamchak tih CM-in a sawi
Mizoram sawrkar-a Vigilance Department chuan nimin khan Aizawl-a I&PR Conference Hall-ah Mizoram Lokayukta, Anti Corruption Bureau leh Mizoram Police te pualin ‘Prevention of Corruption Act, 1988’ chungchang ah Training-cum-Workshop buatsaihin he hun hi Chief Minister Lalduhoma chuan hmanpuiin a hawng a. Chief Minister chuan sawrkar langtlang leh thianghlim din an duh avangin rang takin Lokayukta chu an thuam chak tih sawiin, “ACB tan lirthei thar leina kan sanction-a, Lokayukta Inquiry Officer te chu Vehicle entitlement kan pe a. ACB a thawkte hnena Special Incentive Allowance pek thin, COVID-19 hripui harsatna vanga sut sak chu kan pe thar a, Lokayukta Inquiry Officer te tan kan pe thar bawk a. Anti-Corruption Campaign an kalpuina tur thlengin Fund kan pe a ni,” a ti a. Hmanraw lamah thuam tha viau mah se a thawktute thiamna leh finna te, an inpeknate kha a pawimawh ber zawk avangin Vigilance Department chuan an pualin Training leh Workshop hi a buatsaih leh ta tih a sawi a, hetiang hun buatsaihtu Vigilance Department chungah lawmthu a sawi bawk.
Chief Minister chuan Inquiry Officer te chu Danin thuneihna sang tak a pek thu pawh sawiin, “In thuneihna hi Dan angin eirukna leh hlemhletna hmuhchhuah nan hmang ula. Investigation in kalpuina tinrengah tu mitmei mah veng suh u.” tiin Department hrang hrangte nena thawhhona tha neih a tul avangin Department zawng zawngte pawh lo thawhpui tha turin a chah bawk a, “Hna in thawk tha tih ka hria a, chutihrualin Pending Inquiry leh Pending Case te pawh in la nei nual tih ka lo hria a. Theihtawp in lo chhuah zel dawn nia,” tiin a chah bawk.
He hun hi Vigilance Department changtu Secretary Dr. YLN Reddy chuan kaihruaiin Chief Secretary leh Chief Vigilance Officer, Khilli Ram Meena chuan hetiang hun an buatsaih chhan tlangpui tarlangin, “Eirukna dona hna thawktute kan tuaihriam hian an theihna a lo pung ang a, chak zawkin hma an la thei dawn a. Anmahni ah phurna leh thawhhona tha zawk a siam kan beisei a ni,” a ti a. Mizoram Lokayukta-a Member (Judicial) Joel Joseph Denga leh Director General of Police (DGP), Mizoram Sharad Agarwal te pawhin thu an sawi bawk a ni.
Hemi hnu hian Technical Session neiin Lokayukta Member Joel Joseph Denga, Law & Judicial Department-a Secretary TL. Guite leh Dr. HTC Lalrinchhana ten kalkhawm te hi thupui hrang hrang hmangin an zirtir a ni.