RIPANS-ah Graduation Ceremony hmanpui
Nimin-a he hun hman ah hian Health Minister chuan RIPANS chu Mizoram a zirna In pawimawh tak a nih thu sawiin, Discipline hrang hrangte chu tangkaina hran theuh nei mahse mihring hriselna enkawl kawnga pawimawh tak vek a nih thu a sawi a. Graduate an nih hnu pawh an thiamna tuaihriam zel turin a chah a. RIPANS chu India hmarchhak State 8 atanga zirlai kalkhawm an nih angin, inpum-khatna hmun tha tak a nih thu a sawi a. Hnam ziarang hrang hrang inzirtawnna, inpawhtawnna hmun pawimawh tak a nih thu sawiin, he Institution an chhuahsan hnu pawhin, inkungkaihna tha an siam tawh chu chhawm nung zel turin a chah bawk a ni.
RIPANS hi North Eastern Council hnuaia hmalakna niin March ni 30, 1995 khan kalpui tanin April ni 1, 2007 khan Ministry of Health and Family Welfare kutah hlan a ni a. RIPANS atang hian tun thlengin B.Sc Nursing zirchhuak mi 879 awmin Post Graduate 65 an awm tawh a. Department of Pharmacy-ah zirchhuak mi 467 awmin Post Graduate zirchhuak mi 163 an awm a. Medical Laboratory Science-ah zirchhuak mi 640 awmin Post Graduate zir-chhuak mi 43 an awm a. Bachelor of Optometry zirchhuak mi 346 an awm tawh bawk. Bachelor of Radio Imaging Technology zirchhuak mi 347 awm tawhin PG Diploma in Nutrition and Dietetics zirchhuak mi 10 an awm tawh bawk a ni. Nimin-a Graduation Ceremony' ah hian Bachelor degree, Master Degree leh Diploma mi 276 hnenah degree hlan a ni.