Rel kawng siamtha tawh

Bairabi leh Jamira inkar Rel kawng leimin vanga chhia chu siam zawh niin nimin atang khan Guwahati atanga Sairang-a tlan Rel chu service tan tir a ni leh ta a, Northeast Frontier Railway (NFR) Chief Public Relations Officer (CPRO) Kapinjal Kishore Sharma a sawi danin, Inrinni tlai dar 4:30 khan Rel tlan chhin tir a ni a, hemi hnu hian Silchar leh Sairang inkara Rel tlan chu tlan tir nghal niin nimin atang khan Guwahati nena inkara tlan pawh tlan tan tir a ni a, Sairang atanga chhuak lovin Guwahati atangin Sairang-ah a rawn tlan phawt a, Delhi leh Kolkata pawh a tahtawl-a tlan chhoh tir leh a ni ang. Tarlan tawh angin Katakhal leh Bairabi Section chhung Assam-a Jamira leh Bairabi inkar Rel kawng hi tun thla ni 3 zan khan lei tlahniam avangin a chhia a, Rel kawng chhia, zawh ngam loh hi metre 70 bawr vel a ni a. Hei vang hian Mizoram leh Assam inkar Rel kawng chu khar niin siamthat hna thawh chhunzawm nghal a ni.