NGHAM in MUHCS zawm an hnial loh thu an sawi

Mizoram-a mimal enkawl Damdawi In, Non-Government Hospital Association of Mizoram (NGHAM) te chuan sawrkarin rate tha pangngai tak a pek theih chuan Mizoram Universal Health Care Scheme (MUHCS) zawm an hnial loh thu an sawi.
Non-Government Hospital Association of Mizoram (NGHAM) Member MUHCS la zawm ve lo - Trinity Hospital, Ebenezer Hospital, Greenwood Hospital, Aizawl Hospital, LRM Hospital, Agape Multispeciality Hospital, Rosewood Hospital, City Hospital leh Aizawl Adventist Hospital te chuan thuchhuah siamin MUHCS an la zawm ve theih loh avanga damlo tam tak leh an chhungten an tuar thin pawi an tih thu tarlangin, MUHCS an la zawm theih loh chhan leh damlo tam tak anmahni mamawh leh pan thintute harsatna tawh leh mipui tam zawk ban phak-a an Hospital te an awm theih dan tura an rawtna leh ngenna te an tarlang.

NGHAM chuan MUHCS 2.0 hnuaiah hian a zawm ve lo Hospital-ah emergency thilah emaw, khum chan loh avang emaw a damlo lut an thahnemin mi tam tak an mangang em em thin nia sawiin, “Amaherawh chu tun dinhmunah Mizoram Sawrkar thuchhuah, April 30, 2026 ami ang chuan heng a hnuaia damlohnate - 1. Damlo ICU a dah nghal ngai, 2. Nunna chhanhim nana zai nghal ngai leh 3. Accident tawk nunna chhan nghal ngai te chauh bill phalsak an nih avangin emergency dang zawng zawng admit ngai si, entirnan; BP sang lutuk te, Zunthlum sang te, Heart Attack te, Nikhawhrelo a awm te, puitling leh naupang khawsik sang, emergency si ICU awm ngai si lo chuan an bill thei lo vek a, hei bakah hian MUHCS zawm Hospital atanga facility tha zawk mamawh vanga a zawm lo Hospital a kal a ngaihin an bill thei lo bawk a ni,” tiin hei hian MUHCS subscriber mai bakah Sawrkar hnathawkte pawh a huam vek tih an tarlang a.

Hetiang a nih avang hian NGHAM chuan sawrkarin rate tha pangngai tak, Kohhran Hospital thenkhat leh Hospital dangte pawh a pek ang emaw, Phai-a Hospital tam takte a pek ang emaw a an pek theih chuan MUHCS zawm hi an hnial lo tih an sawi a, MUHCS an zawm hian mipui te tan thatna tam tak a neih dawn avang te, phai-a pawisa tam zawk sen ngai lova Mizoram chhung ngeia inenkawl a theih chuan mi tam tak tan malsawmna a nih dawn thu leh ram economy in a that phah dawn bawk thu te an sawi a. “Mizoram Sawrkar hian Mizoram a Private Hospital kan neih ve te hi phai lam Hospital inremna zulzuiin inremna min siam pui thei se kan duh hle a. Hospital thenkhat, MUHCS cashless a zawm lo, an hnena inenkawlte erawh MR bill thei si (Deemed Empanelled) Hospital te dinhmun ang tala kan zawm ve theih hma pawhin min dah turin kan ngen,” an ti bawk.