MZP buatsaihin hmun hrang hrangah ‘Hnamdang Nupui Pasal neilo tura inzirtirna ni’ hman a ni

Mizo Zirlai Pawl (MZP) ten kum 2015 atanga ‘Hnamdang nupui/pasal neilo tura inzirtirna ni’ an hman thin chu nimin khan a vawi 12-na atan hmun hrang hrangah hman leh a ni.
MZP te hian kum 2015 atang khan kumtin September 2-ah ‘Hnamdang Nupui/Pasal neilo tura inzirtirna ni’ hi hmangin School hrang hrangah kalin Zirlai naupangte chu Hnamdang Nupui/Pasal neilo tura zirtirna an nei thin a, kumin ah pawh he ni pual hian Aizawl-a School paruk-ah he ni pual hian hun hmangin MZP General Hqrs. hruaitu ten thu an sawi a, Aizawl bakah District thenkhata MZP Hqrs. leh Sub-Hqrs. bul tumin he ni hi hman a ni bawk.

Heng hmun hrang hranga thu sawitu MZP hruaitute chuan Mizo-te chu chimral tham lek khawp a tlem kan la nih thu sawiin, Khawvel-a hnam tlem zawkte boralna thlentu leh boral chhan awlsam ber chu inneih-pawlh hi a nih avangin hnamdang te chu thian-ah kan siam a nih pawhin nupui/pasal atan erawh chuan kan ram, kan hnam a boral loh nana mahni hnampui ngei neih tum turin zirlai te chu an fuih a. “MZP chuan Mizoram hi tu kutah mah dah a phal ngai dawn lova, State thenawm Tripura-ah chuan a ram neitu zawk Debarma (Indigenous People)-te chu tunah chuan Minority dinhmunah ding tawhin, Kum 20 hmalama a ram neitu ni miah lo te thuhnuaiah tunah chuan an kun mek a. Chutiang dinhmunah chuan keini Mizo te pawh hi ding ve thei kan ni a, kan ram Mizoram-ah ngei hian hnamdangte thuhnuaiah kan ding ve thei tih hriain chutiang ang a thlen loh na tur chuan kan lo in ven lawk a ngai,” tiin Zirlaite mai bakah nu leh pa te pawh mahni inchhungah hetiang inzirtirna hi an fate hnena pe thin turin an ngen a ni.

MZP chuan Mizo hmeichhia in hnamdang pasal a neih chuan ama nihna bo lo mah se a fate chu Mizo an ni thei tawh lo tih sawiin, “An pa hnam an chhawm tawh a ni tih ‘The Mizo Marriage and Inheritance of Property (Amendment) Act, 2026’ ah chiang takin a in ziak a. Schedule Tribe (ST) Certificate an nei thei tawh lo. Chuvangin Schedule Tribe (ST) quota hrang hrang, Scholarship leh hamthatna dang an chang thei tawh lo a ni,” an ti bawk.