MNF party huaihawtin Serchhip-ah Martar Day hmangin Martar te zahna hlan an ni

MNF Party chuan nimin khan Mizoram hmun hrang hrangah ‘Martar Day” hmangin Serchhip-ah pawh he Ni hi urhsun taka hman a ni.
Martar Day pual hian Serchhip East Block MNF chuan nimin chawhma dar 11:00 khan Serchhip Bazar-a ‘Martar Thlan Lung’ ah hun an hmang a, he hun hi Serchhip East Block MNF Vice President, B. Vanlalngura chuan kaihruaiin Upa K.Chalzika, Ex-MNA chuan Hunserh a hman bakah PAMRA Saizahawla District aiawhin C. Vanlalsiamthara chuan thu a sawi bawk a, MNF Party hruaitu leh Martar chhung ten Martar te Lungphun-ah hian zahna pangpar an ah a ni.

Hemi hnu hian Sub-Hqrs. YMA Hall-ah ‘Martar Day’ pual hian hun hman zui a ni a, he hun hi Serchhip East Block MNF President, C. Lalrinfela chuan kaihruaiin khuallian nia he hun rawn hmanpuitu MNF Working President Tawnluia chuan Martar Day Vawi 46-na hmang tura kalkhawmte chibai bukin, “A lehlam zawnga thlir chuan ram leh hnam tana Martar te ni hman a ngai ta hi a lungchhiatthlak hle a ni. Chutih rual chuan ram leh hnam chhan tura penchhuak kan thiante, unauten an nunna an hlan a. Pathian in dikna chanvo min pek venghim tura chhuak, nunna hlantute hi Mizo Hnam Martarte an ni. Mizo Hnam Martarte hi kan Hnam rohlute an ni a. Mizo Hnam meichher chhitute an ni tih kan hriat nawn leh a tul a ni,” a ti a. “Mizo Hnam Martar Thlanmual, Luangmual-ah khuan MNF hnam sipai, zalenna suala Martarte chauh dah an ni lova. MNF pian hmaa British dotu Mizo Hnam pasaltha te hming pawh dah vek a ni. Chuvangin Hnam Martar Thlanmual dik tak a ni,” a ti bawk.

MNF Working President chuan tunhnaia an party-a chanvo inruat thar chungchang pawh sawiin, “Tunhnaia MNF OB ruat tharte hian tumahin Candidate nih kan tum lo.Thalaite khawvel a ni tawh a, chuvangin MNF hian ram kaihruai a, hmasawnna kawng zawhpui turin Mizo nationalism a chiang thalai a tam thei ang ber kan Candidate dawn a ni,” a ti bawk.

Nimin-a Martar Day hmanna ah hian Martar te sunna hun hmangin MNF General Hqrs. atangin General Secretary J. Malsawmzuala Vanchhawng leh PAC Member K. Lalthawmmawia te pawhin thu an sawi a, Serchhip East Block-a NCM, K. Tlangthanmawia chuan lawmthu sawiin hun a hmang bawk a. He hunah hian Serchhip-a MNF party hruaitu thahnem tak leh Martar chhungte an tel a ni.