Mizoram-a CSR Conclave hmasa ber neiin Bank pahnih in CSR Fund-a hmalakna tur an puang
Mizoram CSR Cell leh CII tangkawp in ni hnih (2) chhung awh tur ‘Corporate Social Responsibility (CSR) Conclave’ an buatsaih ah hiaan Chief Minister Lalduhoma chuan Company hrang hrang aiawh lo kalkhawmte chungah lawmthu sawiin, “CSR Fund hi India ramah kumtin cheng vbc. 34,000 vel a awm thin nia ngaih a ni a, ram hmasawnna hna tha tak tak thawhna sum hnar tangkai tak a ni. Amaherawh chu Hmarchhak Bial leh Mizoram hian CSR hi kan dawng tlem hle a, Industrial State ten an dawng tam bik thin,” a ti a. “Mizoram hi a ralmuang a, ziak leh chhiar thiam tamna State kan ni a, khawtlang nun nuam tak leh sawrkar ngelnghet tak nei thin kan ni a. CSR Project kalpui nana hmun tha, remchang tam tak awmna a ni,” tiin hei hi CSR Fund nei Company ten an rawn hmuhpui a, Mizoram State-a hmalak theihna remchangte an rawn hriatpui an duh thu a sawi a ni.
Nikum khan CSR Cell leh CII tangkawp chuan ‘CSR Workshop’ an buatsaih tawh thu leh chumi zarah chuan Mizoram-ah CSR Project pahnih, New Age technology Labs Project leh Darzo Ground Water Recharge Project te hmuh a nih thu Chief Minister chuan sawiin, “Kan lawm hle,” a ti a. Kumin ah Mizoram-a a vawi khat nan Conclave hi buatsaih a nih thu sawiin, “Investment kalpuina tur chi nia kan ngaih Project 85 zet kan lo duang lawk a. Rah tha tak tak a chhuah kan beisei a ni,” tiin Company palai lo kalte chu Mizorama hun nuam tak hmang turin a chah a ni.
Mizoram CSR Conclave hmasa berah hian Company lian aiawh mi 25 vel lo tel tura beisei niin Mizoram CSR Cell chuan heng Company aiawhte hmaah hian Mizoram-a CSR Fund hmanga Investment kalpui theih tur chi Department hrang hrang atanga a lakkhawm project 85 a chhawpchhuak dawn a, Department Official te leh Company aiawhten an sawiho zel dawn a. He Conclave-ah hian SBI chuan an CSR atangin Mizoram sawrkar hnenah Garbage Truck an pek dawn thu puangin HDFC chuan CSR atanga Aizawl Civil Hospital Trauma Centre Building sak zawmna tur (Vertical Extension) Nephrology leh Urology Ward atana hman tur Mizoram sawrkar an pek tur thu an puang bawk.
He Conclave hi nimin khan chhunzawm leh niin Labour, Employment, Skill Development & Entrepreneurship Department changtu Minister Lalnghinglova Hmar chuan a hmanpui a, Mizoram chu inkalpawhna ah hma kan sawn hle tih sawiin, India ram khawpui lian atang chuan thlawhtheihna hmangin hun reilote chhungin Mizoram chu a thlen theih tih a sawi a. Company lian tak tak te chu CSR hmanga Mizoram ti hmasawn tura thawktu ni tura a sawm bakah, Mizoram chhunga leilung hausakna hrang hrang awmte rawn bel chiang tur leh heng hausakna hmang hian ram ti hmasawn tura an thiamna leh theihna hmang chhuak turin a chah bawk a ni.
He hunah hian CSR Cell Chairman, TBC. Lalvenchhunga chuan Mizoram tih hmasawn nan CSR chu tangkai taka hman a nih theih nan Chief Minister kaihhruaina hnuaiah CSR Cell din a nih dan a sawi a. CSR Cell leh Confederation of Indian Industry hruaitute hmalakna zarah ‘CSR Conclave Mizoram 2026’ kaltlangin Company aiawhte, Sawrkar Department aiawhte leh NGO aiawhte inkawmna hun tha tak buatsaih a ni chu lawmawm a tih thu leh India State dangte ruala hmasawnna hmel hmu ve zel turin Mizoram pawh a inbuatsaih thu a sawi bawk.
CSR hi Company-in a sumdawnna atanga hlawkna a neih dan a zirin, khawtlang tih hmasawnna tur atana ‘Companies Act 2013’ in mawhphurna a pek a ni.