Mizoram-a chhungkua zawng zawngte vaihlo leh a kaihhnawih tel lohna chhungkua din tum turin ngen
State Anti-Tobacco Day vawi 13-na chu nimin khan Mizoram-ah hman leh niin Directorate of Health & Medical Education Auditorium, Aizawl-a he ni puala hun hman ah Health Minister Lalrinpuii chuan mihring cheng zat atanga chhutin Mizoram chu India rama Cancer vei tamna ber a ni mek tih sawiin, Vaihlo zuk leh hmuam chu Cancer siamtu a nih avangin Mizorama chhungkua zawng zawngte vaihlo leh a kaihhnawih tel lohna chhungkua din theuh tum turin a ngen a. Tunhma atang tawhin uar tak leh nasa takin zuk leh hmuam do hna kalpui thin a nih thu sawiin, tunah pawh tha thlah lovin a aia uar lehzuala tan lak thar a ngai tih a sawi a. Zuk leh hmuam dona kawngah chak zawka ke an pen theih nan mipui chhiah tlingkhawm - Cess atangin hma thar lak tumin ruahmanna an siam mek, tih a sawi bawk.
National Health Mission (NHM) hnuaia National Tobacco Control Programme (NTCP) leh Indian Society on Tobacco and Health, Mizoram tangkawp buatsaih he programme hi NHM Mission Director Dr. R. Lalchhuanawma chuan a kaihhruai a. School Education Director Angela Zothanpuii pawhin thu a sawi a, Anti-Tobacco Day hi District hrang hrangah an remchan dan anga ruahmanna siamin District Tobacco Control Cell kaihhruaiin hun an hmang theuh a ni.
Kum 2013 atang khan Mizoram State Anti-Tobacco Day hi hman tan a ni a, Mizoram hi India rama State Anti-Tobacco Day hmang hmasa ber niin State Anti-Tobacco Day hi September ni 11-a hman thin tura ruahman a nih angin kum 2013 atangin kumtin hman thin a ni.
Khawvel pum huapin Global Adult Tobacco Survey 2016 - 2017 (GATS) chu kum 15 chin chunglam zingah neih thin a ni a. He Survey atanga a lan danin India ramah vaihlo zuk leh hmuam hman kawngah Mizoram hi a hmang nasa ber 2-na a ni mek a, mihring 58.7% zetin an hmang mek a ni. Zirlai naupang kum 13 atanga kum 15 inkar zinga zirchianna Global Youth Tobacco Survey - 4 (GYTS-4) ah India ramah Mizoram chu a sang ber niin 58% zet in an hmang mek bawk a. Tunah hian Global Adult Tobacco Survey hi neih mek niin Global Youth Tobacco Survey hi neih leh tum mek a ni bawk.