Mitdelte hman tur bik Safe Mobility Device sem a ni

Mizoram sawrkar leh Toyota Kirloskar Motor Pvt. Ltd. te hmalakna in nimin khan Aizawl Dawrpui Multipurpose Centre-ah Aizawl leh Lunglei District chhunga Mit khaw hmuh lama harsatna neite tan a bika siam Tiang, Safe Mobility Device sem a ni.
Safe Mobility Device semna hun hi Social Welfare, Women & Child Development Department Minister Lalrinpuii chuan hmanpuiin Sawrkar leh Toyota Kirloskar Motor ten thawhhona tha tak neia Safe Mobility Device an sem thei chu lawmawm a tih thu a sawi a. Mizoram Sawrkar chuan Pianphunga rualbanlote tana hamthatna awm thei ang ang haichhuahpui leh an hmasawnna tur ngaihtuah chu a ngai pawimawh hle tih sawiin, hemi lama hma la tur bik Commission pawh a din hial tih a sawi a. India ram chu Welfare State a nih ang leh ram Danpui pawhin chiang taka a tarlan angin, hetiang lama hmalaknate hi Sawrkar mai bakah mi tinte mawhphurhna a nih thu sawiin, Department mi leh sate thawhrimna chu fakawm a tih thu bakah Kohhran, khawtlang leh ram inrelbawlna ah te thleng pawhin chanhai zawk ten lei rem an rah ve theihna tura remchang siamsak chu mi zawng zawng mawhphurhna a ni tih a sawi bawk.

Nimin-a he hun hman hi SW&WCD Department Joint Secretary Zonunthari chuan kai-hruaiin Social Welfare Department Director Vivek Kumar Tripathi chuan Mitdel Tiang sem tura Department hmalaknate sawi zauvin, Alien Innovations atangin Ravi chuan kalkhawmte hmaah hian Device hman dan tur chu a takin a entir bakah Roshan R, General Manager, TKM chuan Mizoram sawrkar nen tangho leh CSR kaltlanga Mizorama hma an lo lak tawhna thenkhatte a sawi zau bawk. He hunah hian a thawh khatna atan CSR kaltlangin Aizawl leh Lunglei District chhunga mit khaw hmuh lama harsatna neite tan a bika siam tiang (Safe Mobility Device) hi sem a ni.