‘Mantang’ sem dan chungchang sawiho a ni

Mizo Inneih leh Rokhawmna dan ennawntu Review Committee chu nimin khan thukhawmin he Dan kaihhnawih hrang hrang bakah ‘Mantang’ sem dan Mizo pi leh pute lo kalpui thinte leh tunhnua kan kalpui dan dik hlel deuh nia langte siam that dan tur an ngaihtuah.
He thutkhawm Secretariat Conference Hall-a neih hi Review Committee Chairman leh Law & Judicial Department-a Addl. Secretary Zahmingthanga Ralte chuan kaihruaiin ‘The Mizo Marriage Inheritance of Property Act, 2014 chu Mizote tan bik chauh a siam ‘Mizo Personal Law’ a ni tih sawiin, ram dang mite bakah kan Indian pui ngei hnam dang leh Sakhaw dangte tan pawh a duan a ni lo tih a sawi a, anni pawhin Personal Law an nei hrang theuh zawk a ni tih hre turin Mizo mipuite a chah a. Chairman kaltlang hian Committee chuan, kumin-a Mizoram Assembly Budget Session-a Mizo Inneihna leh Rokhawmna Dan siam that ‘The Mizo Marriage & Inheritance of Property (Amendment) Act, 2026’ angin Kohhran hrang hrangten Inneihna Certificate an pekchhuah ah ‘Divorce’ tih thumal chu ‘In accordance with the Mizo Marriage & Inheritance of Property Act, 2014’ tia thlak vek turin Kohhran hruaitute a chah bawk a ni.

Kohhran ten anmahni huangchhungah inneihna thiah leh inneih leh phalna pek dan an neih chungchangah he Dan hi inrawlh lo mahse, he Dan siamthat vang leh Ram Dan-in a phut angin ‘Nupui pasal then tawhin mi dang neih leh an duh chuan inneih tir hmain Court atangin an nupui pasal hmasa an then tih lantirna (Divorce Certificate) an nei ngei tur a ni a, chutiang nei lova midang nei leh chu kum 7 emaw, a thua zirin kum 10 thleng pawh lung In tan tira hrem theih an ni dawn tih  a sawi.

Nimin-a thukhawm hian Man leh Mual inhlannaa Thian man leh Nuta man bakah Nu man chungchang pawh ngaihtuah nghalin, Thian man chu mi nawlpuiin inneihna kan kalpui mek dante thlir chung leh Perry Sap Dan (A monograph on Lushai Customs & Ceremonies)-ah te, Mizo Hnam Dan 2006-ah te a lo lan tawh avangin huam zau zawk a telh chhunzawm an rawt dawn tih a sawi a, Nuta man erawh chu hman ngai loh thil leh chin thar mai nia a lan avangin ching chhunzawn lo hram turin Mizo mipuite a ngen a. Hei bakah hian Nu man chu hringtu nu chauhvin a ei tur, chupawh man dawngtu a nih loh emaw, pasal nei tur-i pa nen an awm hran chauhva a ei tur a ni a, midangin Nu man an ei thei lo tih an sawi bawk a ni.