Lirthei chesualah kumin chhungin mi 68 an thi tawh

Kumin thla riat (January atanga August) chhung khan Mizoram-ah lirthei chetsualna tum 69 thlengin mitthi 68 an awm. Mizoram Police chhinchhiah danin thla riat kalta chhung khan lirthei-a chetsualna thihna thleng tum 62, hliam natak tuar awmna 5, hliam tenau tuar awmna tum khat leh hliam awm lohna tumkhat thlengin lirthei chetsualna thleng zawng zawng tum 69 a ni a. Heng lirthei chetsualna thlengah hian thi mi 68, hliam natak tuar 18 leh hliam tenau tuar 22 awmin lirthei chetsualna tuartu mi 108 an awm a ni. Police chuan lirthei neitu/khalhtuten an lirtheite tangkai taka an hman mék lai hian a khalhtu/hmangtu leh kea kal (pedestrian)-te tan pawh mit khap kár leka nunna hlu tak chân theihna leh kum khaw chawr lohna min thlen theitu a ni tih hriaa fimkhur turin an chah a ni.