Kumin ah MUHCS atangin nuai 9960 pek a ni tawh

Mizoram Universal Healthcare Scheme (MUHCS) 2.0 kaltlangin sawrkar kum kal mek ah damlo enkawlna atan August thla thleng, thla 5 chhung khan damlo bill 31,832 atan cheng nuai 9,960 pekchhuah a ni tawh a; nikum April atanga August  thla chhunga MUHCS 1.0 hmanga sum pek aiin cheng nuai 6,161-in a tam a, damlo bill pawh nikum aiin kumin ah 3,204-in a tam tawh zawk.
Mizoram State Healthcare Society-in MUHCS hmangtu damlo bill pekchhuah tawh chin a tarlan danin, sawrkar kum kal mek 2026-2027 ah hian kumin April thla atanga August thla chhung khan Mizoram sawrkar chuan MUHCS zawmtu damdawi In te hnenah damlo enkawlna senso tur tum 13 a pechhuak tawh a, pawisa pekte chu damlo bill 31,832 atan cheng nuai 9,960.56 a ni.

Sawrkar kum liamta 2025-26 ah khan April atanga August  thla chhung vekin MUHCS zawmtu damdawi In te hnenah tum 26 pawisa pek a ni a, chungte chu damlo bill 28,628 atan cheng nuai 3,798.89 niin, nikum leh kumin thla 5 chhung ve ve a MUHCS bill pek hi cheng nuai 6,161.67-in a inthlau tawh. Bill lut zat pawh nikum ah 28,628 a nih laiin, kumin ah 31,832 a lut tawh a, a inthlauhna hi 3,204 a tling a ni.