LPG man la tlahniam thei lo

Sawrkar laipui in kumin March thla atanga eirawngbawlna Gas man a tihsan hnuah ala tla-hniam leh ta lo a, Commercial Cylinder man chu ala sang chho zel a ni.
Indian Oil Corporation-in eirawngbawlna gas (LPG) man a tihchhuah thar angin Food, Civil Supplies & Consumer Affairs Department chuan September thla chhunga Mizoram khawpui hrang hranga LPG man a bithliah thar ah Vairengte tihloh Mizoram khawpui dang zawngah chuan kg. 14.2 a riat domestic cylinder man chu bur khat zelah Rs. 1,094 a ni dawn a, Domestic Cylinder man hi West Asia buaina avanga kumin March ni 7-a sawrkar laipuiin a tihsan hnuah ala tlahniam leh ta lo a ni.

Tun thla atan Commercial Cylinder man chu Rs. 3,228.50 niin thla hmasa aiin Rs. 11 in a sang a, XtraTej man pawh thla hmasa khan Rs. 3,239.50 a nih laiin tun thlaah chuan Rs. 3,251/- a ni dawn a, kg. 10 a rit Composite Cylinder man chu danglam lovin Rs. 787/- a ni ang. Gas man hi Home delivery kalpuina ah chuan a man pangngai atangin Rs. 70 zel belh tur a ni a, Point delivery-ah Rs. 7.53 belh tur a ni a. Distributor Kudam-a hralh a nih chuan Rs. 33.43 paih tur a ni thung.