Kum 2025-2026 chhungin Geology & Mining Department in chhiah cheng vbc. 5 chuang an hmu

Geology & Mining Department chuan kum 2025-2026 chhung khan Chhiah chi hrang hrang atangin sum Rs. 5,29,95,962 an hmu a, Minor Minerals atanga Chhiah hmuh chu a tam ber a. Hetihlai hian Mizoram-a leiminna hmun te pawh tlawhin hmun 52 chu endik a ni.

Geology & Mining Department in kum kalta chhunga sum an hmuhna te hi Minor Minerals (Lung leh Balu) atanga Chhiah an hmuh Rs. 4,74,27,317 te, ram chhunga Company ten Petrol leh Gas an zawnna (Petroleum Exploration License) atangin Rs. 53,94,945 leh Chhiah tenau dang atangin Rs. 1,73,700 te a ni a. Nikum chhunga Minor Minerals atanga sum hmuh hi lung (quarry) atangin Rs. 4,20,78,884 leh Balu (sand) atangin Rs. 53,48,473 te an ni.

Directorate of Geology & Mining Annual Report 2025-2026 tarlan danin Mizoram-ah leihnuai hausakna zawn hna chu ONGC (Oil & Natural Gas Commission), OIL (Oil Inmdia Limited) leh VEDANTA Ltd. ten thawkin ONGC hian February ni 1, 2012 khan Meidum a lei an verhna atangin Gas an hmuchhuak tih an sawi a, hei bak chu hmundang atangin Oil leh Gas hmuhchhuah a awm lo niin a tarlang a. Report chuan Meidum khuaa Gas (hydrocarbon) hmuhchhuah hi a tam tawk lo niin a tarlang. ONGC hian State chhunga ram sq. km 5340-ah leihnuai hausakna zawn hna hi an thawk a, OIL hian sq. km. 3213 ah thawkin VEDANTA Ltd. hian Kolasib District hmun thenkhatah hma an la bawk a. Tun thlengin Meidum hmuna hydrocarbon hmuhchhuah bak hmuh dang an la nei lo a ni. Hetihlai hian Ministry of Coal hnuaia Central Mine Planning & Design Institute, Ranchi hmalakna in Lunglei District-a Rotlang-ah lungalhthei zawn hna thawh a ni a. March ni 13, 2025 atanga July ni 31,2025 chhung khan leiverh (boreholes) hna hmun 15-ah thawh a niin lei chhung metre 4680 a thuk verh a ni a, lungalhthei (coal) a awm ngei nia hriat a niin mithimate zirchian turin thawn a ni. Hei bakah hian Saitual District a Lamzawl ramah lungalhthei zawn hna hi thawh leh tum a ni bawk.

Kum kalta (2025-2026) chhung vek khan Directorate of Geology & Mining hian Mizoram chhung hmun 52 ah leimin vanga chhiatna thleng an endik bawk a. Mizorama leimin leh leikhi chu Fur laiin a nasa zual tih sawiin hei hi a chhan ber chu Mizoram in ruahtui a dawn tam vang niin an sawi a. Hei bakah hian hmasawnna hnathawh hrang hrang avangin chhiatna thleng a awm thin tih report ah hian an tarlang bawk.

Nikum chhunga Directorate of Geology & Mining in leimin leh lei che an endik langsar zual te chu Champhai Vengsang, Chhungte (Champhai), Kawltheihuan Mission Veng, Chawnpui Veng-thlang, Chanmari West, BCM Biak In Mamte leh Thingfal, Samtlang, Hliappui, Sihphir-Chamdur kawng, CHC Ngopa leh Bualte, Lunglei District te an ni. Hei bakah hian Geotechnical Investigation hmun 31 ah an nei bawk.