Argiculture leh Tourism Department-te tangkawp huaihawtin Saichal-ah ‘Lo Zawh Pui’ hman a ni

Argiculture Department leh Tourism Department-te tangkawp huaihawtin nimin khan Saichal-a Zaupui-ah Lo Zawh Runpui neih a ni a, P&E Minister F. Rodingliana leh Tourism Minister Lalnghinglova Hmar ten an telpui a ni.

Lo Zawh Pui-ah hian Bialtu MLA leh P&E Minister F. Rodingliana chuan Sawrkarin kuthnathawktute dawmkan nan theihtawp a chhuah tih sawiin, an thlai chin thenkhatte a lei sak bakah Lo hal zawha thlai chin (shifting cultivation) aia hrisel leh ram tichhe lo zawk ‘permanent farming’ kalpui tan mek a nih thu a sawi a. Lo te chu khawl hmanga tihchangtlun zel an tum thu sawiin, tuihna tha tak tak hman tangkai a nih theih nan leh ni zung chakna ‘solar power’ hman a nih theih nan hmalak an tum thu a sawi bawk. Minister chuan Lo neih chu Mizo nuna bet tlat a ni tih sawiin, Saichal Lo Zawh Pui chu Mizo taka khualzin hipna tha tak a nih a beisei thu a sawi bawk.

He hunah hian Lo Zawh thlengtu leh Tourism Minister Lalnghinglova Hmar chuan khualzinte hip thei, Mizote Mizona chhawmnung zel thei tur Tourism Department chuan a ngaihtuah chhuak tih sawiin, Lo Zawh Pui chu Agri-Tourism leh Horti-Tourism nena inkaihhnawih pawimawh tak a nih thu a sawi a. Lo Zawh Pui chu Sawrkar thil tum pawimawh tak, Department hrang hrang thawhhona ‘convergence’ tihlawhtlingtu a ni tih sawiin, Lo Zawh Pui chu Mizoram mipui ten Saichal khua an hmelhriatna tur a nih thu a sawi bawk.

Lo Zawh Pui puala hun tawite hman anih hnu hian pawl pathum-ah inthenin hlo thlovin Lo zawh a ni a, hemi hnu hian Zau Pui Lo Zawh Concert neih chhunzawm a ni a, tlai-ah mipuiten ruai an theh nghal bawk a. Agriculture leh Tourism Department Official thahnem takin he Lo Zawh Pui hi Aizawl atangin an hmanpui a ni.

Kum 2008 khan Saichal khua hian Lo Zawh Pui an lo buatsaih tawh a, Saichal hi In 250 khua niin khawtlang mipuite eizawnna pui ber chu Lo neih a ni.