ZPM in ACB-ah FIR thehlut
Nimin-a thuchhuah an siamah ZPM Thalaite chuan July 7, 2026-a an Vice President Isaac Lallungawia Rokhum-in thuthar thehdarhtute a kawm tuma a lo sawi tawh angin Economics and Statistics building hi 2014 a NECS in an sak a nih thu leh kum 2021-a MNF Sawrkar lai khan a building hnuailam hi sak chhun-zawm leh tura rawtna a awm avangin May 19, 2022 khan PWD, Quality Control, Research and Development Sub-Division I chuan Inspection neiin a building structure hi a nih dan tur M20 grade aia hniam, M10 grade aia hniam vek a nih avangin sak chhunzawm chi ah an ngai niin an sawi a.
PWD Quality Control hian an thil hmuh-chhuah hi June 6, 2022 khan Director, Economics & Statistic leh Director, Disater Management te hriattirin March 27, 2023 khan Aizawl DC in Joint Inspection nei tura a tih angin April 6, 2023 khan enfiahin he building hi a himlo hle tih Joint Inspection Report-ah tarlan a nih thu an sawi a. Kum 2023 khan Accountant General-in Audit a kalpuina ah he building chungchangah hian Mizo-ram Procurement Rules bawhchhiatna engemaw zat a hmuchhuak bawk nia sawiin, he Building sak hna pawh hi a nih tur ang tling pha lo tiin, NECS pawh insawifiah tura tih an ni tih an sawi a ni.
Hei bakah hian June 9, 2026-a Mizoram State Project Monitoring Committee in Inspection an neih ah he building satu NECS hian dân tam tak a bawhchhe ngei nia report in Action la turin Sawrkar pawh a ngen hial tih an sawi a. Hetiang hnam ro tling tur heti tak maia suasama a awm hi ngawihbo pui chi ah an ngai lo tih sawiin, ACB-ah hian an thlen ta tih an sawi a ni.