Rulhut hlo pek beihpui thlak a ni leh dawn
Serchhip District-a NDD hman dan tur ngaihtuah hian nimin khan Serchhip DC Meeting Hall-ah District Co-ordination Committee chu Addl. DC, Dorothy Muansangi kaihhruaiin an thukhawm a, he hunah hian Senior Chief Medical Officer (CMO) Dr. Lallawmpuii chuan rulhut hlo pek pawimawhna hrang hrangte sawiin kum khatah vawi hnih - February leh August thla-ah te Rulhut hlo ei thin a nih thu leh kumin February thla khan a thawh khatna ah hlawhtling taka Rulhut hlo pek beihpui hi thlak a lo nih tawh thu a sawi a ni.
He hunah hian Deputy Chief Medical Officer Dr. Lallawmkimi Chhakchhuak hnen atangin August 10-a National Deworming Day hman tur atana inbuatsaihna leh ruahmanna hrang hrangte ngaihthlak niin tunlai-a Rulhlut hlo chhuak thar chu thial chip emaw, chiah zawp emaw-a lem mai theih, eisual hlauhawm lo leh thil dang nen pawha inhal lo a nih thu a sawi a, a theih phei chuan mitin tan thla ruk (6) dana ei chu duhthusam a nih thu sawiin, ei nawn pawh a theih thu a sawi bawk.
Tun thla ni 10-a National Deworming Day hman turah hian Serchhip District chhunga School hrang hrang, College leh Anganwadi Centre-ah te Rulhut hlo hi sem a ni leh dawn a. Heta la ei hman lo te leh School kal lo te chu August ni 17-ah Mop-Up Day hman leh a ni ang. Rulhut hlo (Albendazole) hi kum 1 leh kum 2 inkar naupangte hnenah 200 mg (a mum chanve) leh kum 2 atanga kum 19 te hnenah 400mg (a pum)-a pek tur niin kum 1 atanga 19 inkar mi 23,160 te hnenah pek an ni ang.