Zirna In pathum-a Classroom sak thar hawn a ni

Mizoram Bana Kaih (Handholding) Scheme hnuaia Mizoram District Transformation Programme (MDTP) kaltlanga Lunglei District-a zirna In pathum-a Classroom sak belh chu nimin khan Lunglei District Bawrhsap Navneet Mann-i chuan a hawng.

Lunglei Bawrhsap in a hawn tak te hi Govt. Leitlangpui High School, Lunglei; Govt. Middle School, Tlabung leh Lungsen Senior Secondary School (Samagra)-a Classroom sak belh (additional classroom) te a ni a, Bawrhsap Navneet Mann chuan Mizoram Sawrkar flagship programme Bana Kaih (Handholding) Scheme hnuaiah kuthnathawktute leh sumdawnna leh eizawnna kawng hrang hranga hma thar latute dawmkan nan hmalakna kalpui mek a nih thu sawiin, hemi rual hian MDTP kaltlangin District tinah hmasawnna thar leh chhawr theih project hrang hrang tihhlawhtlin nan Deputy Commissioner-te kuta sum dah hmangin hma lak chhoh mek a nih thu a sawi a ni. Hei bakah hian Lunglei Bawrhsap chuan MDTP hnuaiah hian Lunglei District-ah Department hrang hrang atanga rawtna lut project pakua kalpui leh zawhfel a nih tawh thu sawiin, Project hrang hrang zingah June 2026 khan Urban Development & Poverty Alleviation Department hnuaia chhim lama 3R Centre hmasa ber hawn a nih thu te, Fisheries Department hnuaiah Sangha khawi chungchang inzirtirna kalpui a nih thu leh Health Department tan Bolero Camper thar pahnih lei a nih thu te a sawi bawk.

Heng Additional Classroom pathum sak nan hian Bana Kaih hnuaia Mizoram District Transformation Programme (MDTP) kaltlangin Lunglei District Catalytic Fund atangin cheng nuai 15 dah a ni a. Additional Classroom pathum sak nan hian cheng nuai 5 theuh sen niin, April ni 5-ah thawh tan a ni a, August ni 5, 2026-ah sak zawh a ni a. Nimin a a hawnna hun hi Lunglei District Education Officer Micky R. Lalenkawla chuan a kaihruai a ni.