ZEP huaihawtin World Humanitarian Day hman a ni

Zoram Entu Pawl (ZEP) huaihawtin nimin khan ‘World Humanitarian Day’ chu a tum hnihna atan Aizawl-a I&PR Auditorium-ah hman a ni.

Kumin a World Humanitarian Day-ah hian thupui atan ‘Khawvela inpumkhatna tihchak leh midangte tanpuina kawnga khawtlang hmasawnna ngaih pawimawh bik’ tih hman niin he hun hmanpuitu State Commissioner for Persons’ with Disabilities, Vanlaldiki Sailo chuan Zoram Entu Pawl ten rualbanlote puihna kawnga hmalak an lakna hrang hrangte chu lawmawm a tih thu a sawi a. Mizoram chhunga District 11-ah Accessibility Audit an neih tawh thu sawiin, a tlangpui thuin vantlang hmun, abikin damdawi In, Biak In, Hotel leh Pisa thenkhatah te rualbanlote tana awlsamna turin hmun thenkhatah hmalakna awm tawh tho mah se, 90% erawh rualbanlote tan a la awlsam lo tih a sawi a, Vantlang hmun reng reng, inthiarna thlengin rualbanlote tan awlsam taka hman theih turin ruahhmanna kan siam vek tur a ni tih sawiin, Lengpui Airport pawh endik turin ruahmanna an siam mek thu a sawi bawk.

Nimin-a he hun hman ah hian Rev. Bishop Stephen Rotluanga CSC, Bishop of Aizawl leh ZEP President ni bawk chuan tawngtaina hun hmangin mipui kalkhawmte lawmna hun a hmang a, chawhnu lamah Panel Discussion neih chhun-zawm niin ZEP, ADRA, Spastic Society, JRS, SELCO Foundation, MHIP leh MDPO aiawhte an thu a. Mizoram chhunga tanpui ngai, harsatna neite mamawh ber chu enge ni tih te, rikrum thil ah rualbanlote’n eng harsatnate nge an tawh thin tih te, khuarel chhiatna lo thlen thuta puih ngai bikte puihna kawngah humanitarian worker te’n enge an zirchhuah tih te leh sawrkar leh humanitarian worker te tangkawpin engtinnge kawng hrangah rualbanlote tel theihna turin hmalakna leh thawh-hona tha an siam theih ang tih te sawiho a ni.