Union Tribal Affairs Minister-ah thlen

New Delhi-a cham mek Minister of State Lalnghinglova Hmar chuan Union Minister for Tribal Affairs Jual Oram chu kawmin Tribal Affairs Ministry kaltlanga Mizoram-a hmalakna awm thei hrang hrangte sawidunin ruahmanna an siam nghal bawk.

Minister Lalnghinglova Hmar hian niminpiah tlai khan Union Minister for Tribal Affairs Jual Oram hi New Delhi-a a chenna In-ah kawmin Mizoram chu Tribal hlang deuhthaw, mihring zaa sawmkua aia tam Scheduled Tribe awmna a nih thu sawiin, Ministry tan pawh ngaihsak leh duat ngai a nih thu a hrilh a. “State te leh sum pawh ngah lo tak kan ni a, chuti chung chuan midang pen ruala pen kan duh a, hmasawn kan tum. Theihtawp kan chhuah a, kan tlin bak piah lamah Ministry puihna kan mamawh a ni,” tiin Zirna leh Sports lama Tribal thalaite mamawh ziakin a thlen nghal bawk.

Union Tribal Affairs Minister Jual Oram hian Minister Lalnghinglova Hmar chu tha taka lo dawngsawngin Mizoram sawrkar hmalakna tha tak takte a lo hriat thin thu sawiin, Sports Minister in mamawh a thehluhte pawh tihhlawhtlin dan kawng a zawnpui tur thu a lo hrilh a ni. Mizoram Tourism Minister in Festival hrang hrang denchhena zin tura a sawmna chu kumin chhunga tih ngei a tum thu a sawi bawk.