MHIP-in Hmeichhe thuam hmanga insawisak leh indeuna chu thleng tawh lo se an duh
Nimin-a Aizawl Press Club-a thuthar thehdarhtute an kawmna ah MHIP General Hqrs. hruaitute chuan tunhnaiah hmeichhe thuam hmanga insawisak leh indeusawhna kan ramah a thleng tih sawiin, “Hmeichhiate hnualsuatna leh hmuhsitna tawngkam hriattur leh chhiar tur a awm chho nawk bawk. Mizo hmeichhiate kan rilru a na in, pawi kan ti tak zet a ni,” an ti a. Hmanlaiin Mizo mipa chu ral leh sa hma-ah zam ngai lovin chhungkua leh khawtlang tana, thlamuanpuiawm leh mawhphurtu an ni thin tih sawiin, “Chung-a mawhphurna hlen thei lo leh tlanchhiate chu ‘Pawnfen fentir tlak i ni’ tiin an lo sawi thin. Vawiin-ah erawh chuan Mizo nunphung a lo danglam in ral leh sa, a hring a hran a beih tur a awm tawh lo. Chuvangin khang hunlaia tawngkam hman te kha Vawiin ah chuan hman emaw, a taka lanchhuah tirna chi a ni tawh lo hul hual a ni,” an ti a. “Politics-ah a ni emaw, eng thilah pawh nise kan in sawisa i, kan in deusawh duh anih pawhin hmeichhe thawmhnaw hmanga tih a nih chuan Hmeichhia te hi kan dam thei ngai dawn lo a, kan pawm thei lo a ni. Chuvangin, hmeichhe thuam hmanga insawisak leh indeuna hi thleng tawh lo se kan ti,” an ti.
MHIP hruaitute chuan Mizo hmeichhe incheina pawimawh leh zahawm ber chu ‘Puanbih’ a nih thu pawh sawiin, Mizo Puan, a bikin Sawrkarin Dan hnuaia a humhalh, GI Puan (Geographical Indication Puan) - Puanchei, Tawlhlohpuan, Hmaram, Ngotekherh leh Pawndum te chu a hmanna tur dik tak leh a hman lohna turte sawrkar hian a ti chhuak tih sawiin, zawm a hlawh tha lo hle niin an sawi a. “Hmun tam takah Puanchei hi ruang khuh nan ten kan la hmang a. Dawhkan han khuh nan emaw, bang cheimawi nan te kan la hmang thin a, hei hi phal loh a ni,” tiin eng program-ah pawh Dawhkan khuh nan te, Bang cheimawi nan te hman tur a nih loh thu an sawi bawk.
Tunhnaiah Mizo hnam humhalhna a nasat thu leh hnamdang pasal nei lo tura inzirtirna pawh kalpui niin hei hi a tha em em tih MHIP chuan an sawi a. “Chutih lai chuan thahnem ngaih vang pawh a ni ang, uchuak taka hmeichhiate deuhsawhna leh hnualsuatna, hmuhsit rawngkai leh ualau taka zilhna hmuh tur a awm hi pawi kan ti takzet a ni,” an ti a. “Mizo hmeichhia fel tak tak, hnamdang pasal neih tum lo, hnamdang pasal nei lo tam tak an awm a. Chuvangin Mizo hmeichhia han tih a tawngkam dengkhawng tak tak leh hmeichhiate chauh thlur bika hmalak hi a dik lo a ni. Kan zavaia kan tanrualna tur anih avangin tumah rilru na lova kan insiam a, tha taka kan tanho thiam hi a pawimawh,” an ti bawk.