Tualto Hnamte Ni pualin Aizawl-ah hun hman a ni
International Day of the World's Indigenous Peoples hi United Nations (UN) chuan kumtin August 9-a hmang turin December ni 23, 1994 khan Resolution a lo pass tawh a, kumin hian Pathianni-ah a tlak avangin Inrinni khan Zo Re-unification Organization (ZORO) buatsaihin Aizawl Vanapa Hall-ah hman a ni a, kumin hian thupu atan ‘Indigenous Peoples and AI: Defending Rights, Shaping Futures’ tih chu hman a ni. Aizawl-a he ni puala hun hman ah hian Art & Culture Minister chuan British awpna atanga India in zalenna a hmuh hnuah Zofate chu ram hrang hrangah thendarh kan nih thu sawiin, “Political boundary avangin ram hrang hrangah Zofate kan awm mek a, ramri-in min daidang mah se Zo hnahthlak unau kan nihna erawh chu ramrii n min then hrang lo se, kan thinlungah Zofa kan ni tih hi vawn tlat a pawimawh,” a ti a. Ram hrang hrang, sawrkar hrang hrang hnuaiah Zofate chu awm mah se, mahni awmna hmun atang theuh Zofa kan nihna identity hre reng chunga inpumkhatna leh inunauna nghet lehzual nei chunga hmalam pan zel turin kalkhawmte chu a fuih bawk a ni.
He hun hi ZORO Vice President L. Ramdinliana Renthlei chuan kaihruaiin khual zahawm nia he hun hmanpuitu Robert Romawia Royte MLA chuan Zofate chu an identity-a chiang tur leh chi bil leh hnam bil theuh nei mah ila, insuihkhawma inunauna nei zel turin kalkhawmte chu a chah a. Khawvel thang zelin a ken tel technology leh Social Media-te chu hmang tangkaia, insuihkhawmna hmanrua atan hmang zel turin a fuih bawk a. ZORO President R. Sangkawia pawhin Zoram a tir atanga luahtu chu Zofate kan ni tih sawiin, “A ram neitu (indigenous people) pawh Zofate kan ni,” a ti a. UN pawhin Indigenous People-te tana thupuan article 46 zet an siam thu leh Zo hnam pawh hi Indigenous People-a pawm kan nih thu a sawi bawk a. Kan pi leh pu ten duat taka an lo enkawl leh hnam dang lak atanga an lo venhim thin Zoram hi hmangaih taka enkawla, venghim zel turin he huna kalkhawmte chu a chah bawk.
International Day of the World's Indigenous Peoples pual hun hman hi hun hnih ah then niin hun hmasa lamah ‘Insuihkhawm Duhna Kawngzawh’ neih a ni a, Millenium Centre atanga Vanapa Hall thleng kawng hi zawh niin hun hnihnaah hian Tualto hnamte ni lawmna inkhawm chu Aizawl-a Vanapa Hall-ah hman chhunzawm a ni a, Zonunpar Cultural Club leh MCO Performing Troupe-ten Hnam Lam entirin ZORO Adviser Rohmingthanga Kawlni chuan lawmthu sawiin hun a khar a ni.