Thenzawl kawng siam dawn

Serchhip atanga Thenzawl panna, Zawlpui peng bul-a kawng chhak leimin avanga harsatna thleng mek sutkianna atan Vawiin hian Boulder phah tura hmalak tan a ni dawn.
    Sailiamkawn atanga Thenzawl lam KM 1 vela hlaa kawngchhak leimin avanga kawng-a kal ten harsatna an tawh mek dinhmun hi tunkar Thawhlehni khan Serchhip Addl. DC Dorothy Muansangi hova enfiah a nih hnuah nimin khan Bawrhsap, Paul L. Khuma hovin Serchhip DC Meeting Hall-ah hmalak zui dan tur sawiho a ni a. Vawiin atang hian kawng ko hniam lai, motor tan theihna laiah Boulder phah tura hmalak nghal tum niin PWD leh Serchhip khaw chhunga kawngpui siam that hna thawktu Urban Infraprojects Pvt. Ltd. ten kawng nal, motor tan theihna laite an thianfai anga. Kawng a phah tur Boulder cubic meter 30 chu Urban Infraprojects Pvt. Ltd. te hian mipui mamawhna avanga tumin a bak tul ang te PWD ten tum belhin kawng thawmthat hna hi thawh a ni dawn a ni. Bawrhsap chuan helai kawng hi kawngpui pawimawh tak a nih avangin mipuite himna leh muanna a pawimawh thu a sawi a ni.