Smart City hmachhawp chhunzawm turin Mizoram Urban Development Agency Ltd. (MUDAL) din a ni
UD&PA Department changtu Minister K. Sapdanga hian Zirtawpni khan Aizawl Smart City Ltd. hnuaia sak Chaltlang Multi-Purpose Sports Complex chu hawngin Aizawl Smart City Limited chu thla thar mai-a tawp tur a nih tawh thu leh, mipui hman tur project tangkai tak tak an la hawng thei chu lawmawm a tih thu a sawi a. Smart City hmachhawp chhunzawm turin Mizoram Urban Development Agency Limited (MUDAL) din a ni tawh tih sawiin, hnathawk tur lak mek niin a rang lama hna thawh tan tum a nih thu a sawi a ni.
UD&PA Minister chuan Mizo thalai infiammiten hma an sawnna tur leh ram chhung leh ram pawna Sports inelna sangah Mizote an lan theih nan he Sports Complex hi tangkai taka an hman a beisei thu a sawi a. Mizo thalai zingah ruihhlo ngawlvei an tam em em a; chuvangin a la ti ve ngai lo ten an tihchhin lohna tur leh a sim tawhte tan pawh damna hmun a nih theih nan he Sports Complex hi tangkai takin hmang se a duh thu a sawi bawk a ni.
Tun tuma hawn tak Chaltlang Multi-Purpose Sports Complex hi cheng vbc. 14.33 senga sak niin Tender hi December ni 4, 2021-ah tihchhuah niin November ni 30, 2022-ah hna an thawk tan a; August ni 20, 2026-ah zawhfel a ni a. Mi 1000 thutna kengtel Basketball cum Volleyball Court awmin Jumbotron pawh dah tel a ni a. Mi 48 thut lenna Boxing Ring leh Table Tennis khelhna tur pawh a awm bawk. Gym room leh Media room te, mi 12 ve ve lenna turin Girls Dormitory leh Boys Dormitory te, Dressing Room, Toilet cum Bathroom, Dining Room leh Two Wheeler Parking Area a awm a, 25kVA Generator in he Sports Complex hi a chawm a ni. He hunah hian Aizawl Smart City Ltd. CEO leh Management Committee aiawhten Complex hmunhma an inhlan a, Management Commitee Chairman Lalhruaitluanga chuan lawmthu a sawi a ni.