Serchhip Kawlri Tlang-a Cultural Heritage Centre sak mek Bawrhsap hovin enfiah a ni
Serchhip Kawlri Tlang-a ‘Cultural Heritage Centre’ sak mek chungchangah hian nimin khan Serchhip Bawrhsap Paul L. Khuma hovin sawrkar mi pawimawh te leh khawtlang hruaitute chu Serchhip DC Meeting Hall-ah thukhawmin hmalakna kal mek leh an thlen chin te thlirho a ni a, Cultural Heritage Centre sak mek hi Serchhip bialtu MLA, Mizoram Chief Minister Lalduhoma hmalaknaa sak niin North Eastern Council (NEC) atangin he hna thawh nan hian cheng nuai 431 (vbc. 4.31) hmuh a ni a; September 2024 khan hna thawh tan niin Public Works Department (PWD) hnuaiah Excell Consultancy Services-ten hna hi an thawk a. He hnathawh hi a tira ruahman dan chuan kumin (2026) February thla-a zawhfel tur a ni a, hnathawktute hian an thawh zawh hman loh avangin December 2026 thleng hun pawhsei sak leh an ni.
.jpeg)
Bawrhsap hova thutkhawm neih a nih hnu nimin tlai khan he hmalakna hi thuthar thehdarhtute chuan a hmunah tlawhin Bawrhsap, Paul L. Khuma chuan he Project hi Chief Minister pawhin a ngaih pawimawh em em a nih thu sawiin, PWD leh Department lamte chuan an tih tur chinte tha taka an tih tawh thu a sawi a, a sak puitlin hna thawk tura rawih Contractor-te chu theihtawp chhuaha hna thawk turin a chah a. MJA Member te pawhin huntiam chhunga thawk zo ngei turin Contractor chu an duh thu an sawi bawk a ni.
Tun dinhmunah hna thawh tur za zela 82% vel zawh tawh a ni a. Tui chhekkhawlna chu siam zo tawhin Cottage Building paruk, Lal In, Quarter Building leh Zawlbuk Building te chu zaa 98 thawh tawh a ni a, Capacity Building hna pawh 95% zawh a ni tawh bawk. Site Development hna chu 60% zo tawhin Cultural Heritage Building leh Ethno-Medicinal Garden siam hnate chu 50% an zo tawh a; Approach Road and Side Drain hna chu 30% thawh tawh niin Children Park and Mini Sport Complex hna chu 20% thawh a ni tawh bawk.