Samuel Lifecare & Cosmetics Private Ltd. hawng
Samuel Lifecare & Cosmetics Private Limited hian kum thum chhung zirbingna (Research & Development) a kalpui hnuah tunah hian Cosmetic chi hrang hrang 46, Home Care products chi 9 leh Food Supplement chi 2 an siam chhuakin an hralh chhuak tan tawh a, nimin-a Company hawnna hunah hian Chief Minister Lalduhoma chuan Samuel Lifecare & Cosmetics Private Limited hawn a ni chu Mizoram tan mai ni lovin, India hmar-chhak tan hun chhinchhiahtlak a tling nia a hriat thu sawiin, an products zawng zawng hi anmahni zirbingna atanga formula an hmuhchhuah behchhan veka an siam a nih thu leh Cosmetics lamah phei chuan India hmarchhaka a hmasa ber leh a awmchhun a nih hmel thu a sawi a ni.
He hunah hin Company neitu Dr. Lalro-khawma chuan report pein kum thum kalta atang tawha bul an lo tan tawh thu leh an thil siamchhuah te chu uluk taka a Formula an chawhchhuah, quality tha tak tura an kalpui a nih thu a sawi a. A formula ber an neih tawh avangin liantham a kalpui thei an ni tawh tih sawiin, “Mipui ten min hmansak duh phawt chuan Mizoram mamawh zawng zawng hi thla ruk (6) chhungin kan siam vek theiin kan ring, kan product-te hi an quality a tha tawk tih hi huai takin kan sawi ngam a ni,” a ti. An thil siam chhuahte chu a bur ruak paih mai lo va thunnawn (refill) theih tura an duan deuh vek thu a sawi bawk.
Samuel Lifecare & Cosmetics Private Limited hian an product te pho chhuahna dawr an la nei rih lo va, a lei duh emaw zuar chhawng duhte chuan Dr. Lalrokhawma (Rka) hi phone number 8167379173 ah biak theih a ni.