Serchhip District-a National Highway siamthat mek dinhmun enfiahin lung tha lo paih tir an ni
Serchhip District Bawrhsap Paul L. Khuma kaihhruaia tunhnaia Serchhip District-a National Highway dinhmun thlirhona neih a nih tuma an lo rel tawh angin nimin khan Serchhip DC Office-a SDC, Chawngthu Lalrinhlua kaihhruaina hnuaiah MJA Serchhip District Member te chuan Khumtung leh Keitum inkara kawngpui siamthat hna thawh mek hi a hmunah kalin an enfiah a, he hunah hian NHIDCL lam atangin Resident Engineer Ram Niranjan Parsad leh Field Engineer Jiten Raut te telin KRAM Infracon Pvt.Ltd. atangin Public Relation Officer (PRO) Lalhruaitluanga te a tel bawk a. Shivalaya Construction Ltd. in Khumtung dai, Serchhip District atanga Baktawng Chan In thlen hma km 5 thleng kawng siam hna an thawh chu tha thawkhat-a an ngaih laiin Baktawng Mualkawi dai atanga Keitum inkar kawng siamtu KRAM Infracon Pvt. Ltd. te hnathawh erawh a muangin duhthu a sam lo hle niin an sawi a, kawng repair-na atana hmun nga (5) lai-a lung an lo chhekkhawl chu Quarry lung a nih loh avangin nimin vek khan an paih tir nghal a ni.
Serchhip District chhunga National Highway-54 Package-I Khumtung leh Baktawng Mualkawi inkar enkawltu Shivalaya Construction Ltd. te hnathawh hi a tha thawkhat-a ngaih niin kumin Fur-ah hian an kawng siam 5% vel chiah siamthat ngai a awm a. Package-II Baktawng Mualkawi Via Serchhip By-Pass Road to Keitum kawng siamtu KRAM Infracon Pvt. Ltd. te hnathawh erawh a chhe hle a, kumin Fur-ah kawng siamsa 80% aia tam mah chu siamthat ngaiin a awm a, hei hi an lung hman quality that tawk loh vang nia ngaih a ni a, nimin-a District thuneitute leh MJA ten an enfiahna ah pawh Quarry lung ni lo tih hriat ngawih ngawih, leiminna hmun thenkhat atanga an lak lung nia hriat lung chhawp a awm a ni. Hetihlai hian Package-III Keitum leh Bungtlang inkar hnathawktu Bhartia Infra Projects Ltd. te kawng siam erawh a tha thawkhat-a ngaih niin siamthat ngai lutuk a awm lo a ni.
NHIDCL hnuaia Baktawng Mualkawi to Keitum inkar kawng siamtu KRAM Infracon Pvt. Ltd. te hi August 7, 2026 khan NHIDCL ten warning pe in ni 15 chhung (August 22, 2026 ralhma) a lirthei kal theih tura kawng chhia repair zo vek turin hriattirna an pe a, Serchhip Bawrhsap Paul L. Khuma pawhin KRAM Infracon Pvt. Ltd. te hi a tuldan a zira an chunga Legal Action lakah a lo vaukhan tawh bawk a ni.