Serchhip-ah India Independence Day vawi 80-na PWD Minister hovin urhsun taka lawm a ni
Serchhip-a India Independence Day vawi 80-na lawmna ah hian PWD Minister Vanlalhlana hian Hnam puanzar pawtparhin Parade Chibai buk a chhanglet a, mipuite hnenah minute 10 chhung thuchah sawiin mipuite chu chibai a buk a, Mizoram Sawrkar leh mipuite thawhhona zarah Serchhip District-in hmasawnna duhawm tak tak a neih thu a tarlang a ni. PWD Minister chuan Serchhip District-ah sawrkar inrelbawlna tha, Administration felfai tak a awm theih nan Deputy Commissioner kaihhruaina hnuaiah chak taka hmalak a nih thu sawiin, Serchhip DC Office chuan digital kaltlanga District chhung hmun hrang hranga sawrkar hmalaknate vilzui (monitor) theihna tur 'Serchhip District Plan & Project Monitoring System' a duanchhuah thu leh he Project hi India ram puma Good Governance Initiative Project thazual, Ministry of Personnel (DARPG)-in a thlan chhuah Top 15 zingah telin Mizoram atanga thlan awmchhun a nih thu a sawi a. Nikum lamah Dan bawhchhiatna veng tura duan Mobile Application pawimawh tak, ‘Vantlang Viltu’ tlangzarh a nih tawh thu leh heng te hian sawrkar hmalakna tichakin, inrelbawlna tha zawk a thlen zel a rin thu a sawi bawk.
Mipuiten rilru, taksa leh thlarau hrisel an neiha, khua leh tui tha kan nih theihna turin NMBA hnuaiah ruihhlo ngai pual Camping te, Hriselna Kutpui-Health Mela te, Ruihhlo do Campaign chi hrang hrangte hlawhtling taka neih a nih thu pawh sawiin, “Hetianga District Administration hmalaknaa sawrkar, tlawmngai pawl leh kohhran zawng zawngte tanhonaa hetiang hun buatsaih thei District hmasa ber kan ni hi a lawmawm hlein ka hria a, intihhmuh chi tak pawh a ni awm e,” a ti a.
A enkawl PWD hnuaiah PWD Serchhip Division ten KM 49.600 a thui kawng sial thar an neih thu leh kawng black top KM 43.7 leh Cement Kawng (PCC) KM 161.172 a thui an siam thu sawiin, Culvert 53 leh leitawlh venna (protection wall) pawh 893 Rm (Running meter) an siam thu a sawi a. Transport Department ten revenue lakkhawm kawngah target khum hialin, cheng nuai 158 zet an hmuhchhuah thu a sawi a, Lirthei pawh 798 lai register thar niin heng sum lakkhawmte hi kan ram hmasawnna atan leh mipuite hamthatna atan hman leh vek tur an ni tih a sawi bawk.
Minister Vanlalhlana chuan Loneih-a eizawnna (Agriculture) chu kan rama eizawnna innghahna bulpui ber pakhat a nih hriain Sawrkar chuan loneitute hmakhua a ngaihtuah reng tih pawh sawiin, Bana Kaih kaltlangin mi engemaw zat tanpui an nih thu leh Sawhthing pawh kumin chhung hian Kg nuai 26.6 zet SCC atangin hralhchhuah niin cheng nuai 748 vel hmuhchhuah a ni tih a sawi a. Hriak tharchhuah-a kan intodelh theih nan Oil Palm, Tung, Chhawhchhi, Bekang, Nihawi, Antam chin leh hmun siam ah te hmalak mek a ni thu a sawi bawk.
Heng bakah hian PWD Minister chuan sawrkar Department hrang hrangte hmalakna tlangpui tarlangin, “Heng hmasawnna leh hlawhtlinna kan sawi tak zawng zawngte hi sawrkar leh mipuite thawhhona that vang liau liau a ni tih hre thar leh ila, Serchhip District hi nuam zawk, intodelh zawk leh hmasawn lehzuala siam turin kan zain i tangrual zel ang u,” a ti bawk.
Serchhip-a India Independence Day 2026 lawmna hunah hian sawrkar hnathawk, zirlaite leh khawtlang hruaitute bakah mipui thahnem tak telin khuallian hi a nupui bakah Lunglei West Bialtu MLA, T. Lalhlimpuia ten an rawn tawiawm a, Inrinni tlai khan Aizawl an pan leh nghal a ni.