Mi tinte khawsak phung chawikang turin sawrkar in hma a la tih CM in a sawi
India Independence Day lawmna Aizawl Lammual-a neih ah Chief Minister Lalduhoma chuan Mizoram dung leh vang ah hmasawnna inkhairual, chhuan lo la awm zel turte tan pawha chhenfakawm, ei leh bara intodelhna kawng an zawh theih nan an hmathlir lai mu - ‘Kalphung thar Mipui sawrkar’ tih chu an au hla a nih thu sawiin, “A la ni zel dawn bawk a ni,” a ti a. Mizoram Bana Kaih (Handholding) ruahmanna chu Mizoram economy siamthatna tura hmalakna pawimawh ber a nih thu sawiin, Department hrang hrangte tanghoin, sum leh paia tanpuina mai piah lamah mipuite thiamna tihpun kawngah sawrkarin hma a la a; eizawnna tha zawk kawhhmuhin, mimal, chhungkua leh ram hmasawn nan hma a la mek zel a ni, a ti.
Chief Minister Lalduhoma chuan thalaiten eizawnna kawng thar dap a, sumdawnna hlawk zawk an neih theih nan Mizoram Bana Kaih Venture Capital Fund siam a nih thu a sawi a. Hei hian cheng vbc. 20 Corpus Fund a keng tel a. Thalai, mahni ke-a din tum ten bul an tan theihna tura puitu tur, State Sawrkarin Venture Capital a siam vawikhatna leh hmasa ber a ni, a ti a. Mizoram Grand Challenge siam a nih thu leh Industrial and Investment Policy, 2025 siam thar a nih thu pawh sawiin, Investor lian tak takte kohluh nan Investment Promotion Agency an din bawk niin a sawi a. Hengte bakah PM DeVINE leh NESIDS kaltlanga sawrkar hmalaknate chuan Mizoram mipuite tan eizawnna a siam belh anga, Mizoram economy than zelna turah nasa takin kawngro a su dawn a ni, a ti bawk.
Mipui sum awmze neia hman leh inrelbawlna tha zawk siam hi an ngaih pawimawh thu Chief Minister chuan sawiin, Mizoram Universal Health Care Scheme (MUHCS) atan Asian Development Bank te nen cheng vbc. 1,000 zet Loan Agreement an ziahfel tawh thu leh za zela 90 chu sawrkar laipuiin a tumsak dawn thu a sawi a. Mizorama kalpui theih chi Centrally Sponsored Scheme (CSS) zawng zawng chu SNA-SPARSH ah an dahlut vek tawh tih a sawi a. Huntiam chhunga tha taka kalpui a nih avangin sawrkar laipui chuan hmalak that lawmman (incentive) cheng vbc. 350 a rawn pe tih a sawi bawk.
An sawrkar chuan Lo leh huan neitute a ngai pawimawh tih pawh sawiin, National Mission on Edible Oils kaltlangin Mizoram District pasarih-ah Oil Palm chin beihpui thlak a nih thu leh ram hectare 1,607-a zau-ah hmalak a ni tih a sawi a. Loneitute hian Oil Palm rah Metric Ton 7,225 an hralh atangin cheng vbc. 10.53 an lei tih a sawi a. Bana Kaih ruahmanna hnuaiah Sawhthing lei leh hralh an kalpui chhunzawm zel ni a sawiin, kum 2025 chhungin Support Price cheng vbc. 140 dawn an pe a, kumin 2026-ah hian cheng vbc. 22 vel an pe leh tawh tih a sawi a. Sawhthing sawngbawl kawngah pawh hmasawnna a awm thu sawiin, Sairang Horticulture Centre atangin Mizo Sawhthing an hralhchhuak thei tawh te chu hmasawnna chhinchhiahtlak tak a ni tih a sawi.
MIDH hnuaiah a thar hun pangngai lova thar chi Tomato leh Zikhlum chin kawngah nasa takin hma an la tih pawh Chief Minister chuan sawiin, kum 2025-ah Tomato Metric Ton 2,770 leh Quintal 5 leh Zikhlum Metric Ton 3,712 leh quintal 64 tharchhuah a ni a, kuthnathawktuten cheng vbc. 40 vel zet an lei a. National Bamboo Mission hnuaiah Mau hmangin furniture siam leh meihawl siamna chu Chhuanthar, Baktawng leh Mamit-ah te hman mek a nih tawh thu a sawi bawk.
India Independence Day lawmna-a Chief Minister Lalduhoma thusawi thenkhat :
* NABARD RIDF leh SASCI project hmangin cheng vbc. 61 sengin Link Road leh PCC pavement siam a ni.
* Kum 2025 chhungin Sawhthing leina Support Price atan cheng vbc. 40 dawn pek a ni a, kum 2026 chhungin cheng vbc. 22 vel pek a ni tawh.
* National Livestock Mission hnuaiah Animal Insurance Scheme kalpui a niin tun dinhmun ah ranvulh 3,290 vel insurance tihfel ni tawhin insurance claim 60 chinfel a ni tawh bawk.
* Mizoram luia nungchate humhalhna atan Branch YMA 93 nen thawhho a ni a. PMMSY kaltlangin Aizawl-a Sangha Zawrhna hmunpui changkang tak siamna tur cheng vbc. 50 chu sawrkar laipuiin a pawmpui tawh.
* Mizoram Water Information and Governance Bill, 2026 pawmin Mizoram State Water Informatics Centre pawh din a ni tawh.
* Mizoram State Special Ration Package chu chhungkaw 29,000-in an chhawr tangkai tawh a. Kum 2026-27 atan Monsoon Stock buhfai quintal 1,67,016 dahkhawl tawh a ni.
* Kawlphetha Megawatt 10 pe chhuak thei Thenzawl Solar Plant hman theih a ni tawh a, Megawatt 24 pechhuak thei tur Tuirini Small Hydel Project pawh thawh mek a ni.
* Khawpui hrang hrangah cheng vbc. 467 chuang sengin hmasawnna ruhrel din leh chei hna thawk mekin ruahmanna fel tak siamin Thenzawl Peace City Project pawh kalpui chhunzawm zel a ni a. Neihloh khaw insawnna tur Neihloh Village Relocation Master Plan pawh duan fel tawh a ni.
* April 2025 atanga April 2026 chhungin MUHCS hnuaiah damlote inenkawlna senso vbc 178.58 hu pek chhuah a ni.