Sawrkar rawn hmasa lo chuan hlih theih loh

Home Minister K. Sapdanga chuan Remna Thuthlung a Mizote tana thil tha inziak zingah Inner Line Permit (ILP) chu State Sawrkar rawn (consult) hmasa lo chuan siam that leh hlih a nih lohna tur thu dah tel a nih thu a sawi. Assembly Session neih meka ziaka zawhna a chhanah he thu hi sawiin Home Minister K. Sapdanga chuan Inner Line Regulation hman mek chu a nih anga chhunzawm tur a ni a, hei hi State Sawrkar rawn (consult) hmasa lo chuan siam that leh hlih a nih lohna tur thu dah tel a nih thu a sawi a ni. Home Minister chuan Inremna ah ‘Mizo Sakhua leh chindan (religious and social practices) te, Customary law te, ram neih leh ram inhlanchhawn dan (ownership and transfer of land) chungchangah te Parliament in dan a siam chu Mizoram Legislative Assembly-in a pawmpui loh chuan Mizoram-ah hman a ni lovang tih a ni’ tih sawiin, Mizoram a tawng hmante Official Languagea hman theihna tur thu dah a ni tih a sawi a, Mizoram-in High Court leh University hran a neih theihna tur pawh dah a nih thu a sawi bawk.