Provincialise phutna ngaihtuah turin Special Cabinet Meeting neih tum

Mizoram Government Adhoc-Aided High School leh Mizoram Government Adhoc-Aided Middle School Teachers ten provincialise an phût chungchang chu naktuk, Thawhlehni hian Special Cabinet Meeting-in a ngaihtuah dawn.

Akashvani News Aizawl zawhna chhangin MIGAHTA President F. Vanlalchhuanga chuan Zirtawpni khan Sawrkar lam aiawhte nen Adviser to CM (Political) Lalmuanpuia Punte Room-ah boruak tha tak hnuaiah inbiakna an nei tih sawiin, tunakr Thawhlehni hian Provincialise chungchang bikah sawrkar hotu ten Special Cabinet Meeting an neih tur thu an dawng bawk tih a sawi a, kalphung thar sawrkarah beiseina sang tak nen Cabinet Meeting an thlir tih a sawi a ni.

MIGAHTA President chuan thla hlui July ni 21 atanga Provincialise phuta Sawrkar laka lungawi lohna an lantir chu School Education Minister Dr. Vanlalthlana'n a ngen avang leh Sawrkar lam aiawhten inbiakna boruak tha zawk a awm theih nana nawrh titawp tura an ngen angin, kar kalta Nilaini zan khan MIGAHTA leh Mizoram Government Adhoc Aided Middle School Teachers' Association (MIGAMSTA) chuan nawrh an titawp tih a sawi a, Ningani atang khan dan pangngaiin Mizoram hmun hrang hranga MIGAHTA leh MIGAMSTA school te chu hawn vek a nih thu a sawi bawk a ni.

Tarlan tawh angin Mizoram Government Adhoc Aided High School leh Middle School zirtirtute hian sawrkar in Provincialised dinhmuna a hlankai tawh ang ngeiin an vaia provincialised-a hlangkai leh vek turin sawrkar an phût a, MIGAHTA-ah hian Kohhran School 8 tiamin, School 95-a zirtirtu 570 an tel a, MIGAMSTA-ah hian Mizoram hmun hrang hranga Middle School 44 atangin zirtirtu 270 an tel bawk a ni.