Oil Palm tiak phurh man pek loh sawihona neih a ni

Lawngtlai District-a Oil Palm chin chungchanga hma latu Patanjali Foods Limited, Oil Palm Division Lawngtlai leh Oil Palm Transportation Vaseikai Seed te chua Oil Palm tiak phurh man inpek loh chungchangah nimin khan inbiakna an nei.

He inbiakna hi Lawngtlai Bawrhsap Donny Lalruatsanga kaihhruaiin a Office Chamber-ah neih a ni a, Bawrhsap chuan Oil Palm Transportation, Vaseikai Seed leh Panjali Foods Limited, Oil Palm Division Lawngtlai atanga lehkha hmuh a nih anga thutkhawm hi neih a nih thu sawiin, Sumdawnna kawngah harsatna awm palh thei a nih thu leh thu inhmuh loh vang pawh a ni thei tih sawiin, Dawhkan khat kila chinfel a tul thin thu a sawi a. Patanjali Foods Limited, Oil Palm Division Lawngtlai leh Oil Palm Transportation Vaseikai Seed harsatna neih pawh tha taka chinfel a pawimawh thu a sawi bawk.

He thutkhawm ah hian Oil Palm Transportation, Vaseikai Seed lam hian kum 2024 atang khan Oil Palm tiak an phur tan tih sawiin, kum 2025 leh 2026-a Oil Palm tiak an phurhna man an la dawn loh thu an sawi a. Patanjali Foods Limited, Oil Palm Division Lawngtlai aiawhin Sr. Officer, K. Lalhmangaihzama chuan kum 2024-ah Transportation man pek a nih thu sawi thungin, kum 2025 atang khan Sawrkar atanga 'Transportation Fund' hmuh a nih loh thu leh Director leh Secretary hnenah lekha thehluh tawh niin chhanna an la dawn loh thu a sawi bawk a ni.

Sawrkar atanga 'Transportation Fund' a awm tawh loh avangin chhanna lehkha an dawn hnuah Panjali Foods Limited, Oil Palm Division Lawngtlai chu thla hnih (2) chhung ngeia Oil Palm Transportation, Vaseikai Seed harsatna tawhte chingfel tura rel a ni.