Ngaizel-a lung tlakna thin a hmalakna enfiah a ni

Ngaizel kham atanga lung tla thin laka kawngpui ân-a awm te leh kawngpui zawhtu mipui leh lirthei te an him zawk nana lung tla mai thei te karthlak (Scaling) hna thawh leh lung tla te kawngpui-a an tlak tlang nghal mai lohna tura kopang/kham tuam hna ‘draping’ thawh chu nimin khan PWD Minister Vanlalhlana chuan a hmunah a enfiah.
Kum 10 kalta chhung khan Ngaizel lungtla avang hian mi 3 in nunna lo chan tawhin, Lirthei ke 2 leh ke 4 nei chi avaiin 16 a lo del chhe tawh a, hliam tuar 8 an awm tawh bakah kawngpui ân a awm In te a lo delhchhe nual tawh a. Kumin July ni 8 leh 9 khan Ngaizel Petrol pump bulah kawngchhak ko sang tak atangin lung leh leivung nasa takin a tla leh a, heng lung leh leivung tla thenfai hna hi JCB(Backhoe Loader) Pahnih (2) leh Tipper sawmli (40) hmanga thawh nghal niin leivung leh Lung tlahnawk zualpui chu August 12 atanga 14 khan then zawh a ni a. Sawrkar thuneitu hrang hrangte chuan Ngaizel kham-a lung tla thin laka mipuite himna tur hian lung tla mai thei te karthlak (Scaling) hna a thawh bakah lung tla te kawngpui-a an tlak tlang nghal mai lohna tura kopang/kham tuam hna ‘draping’ hi a kalpui ta a ni.

Ngaizel kham tuam (Draped) nan hian Green Draping HDPE (High Density Poly Ethylene) hman a ni a, ruah leh nisa laka leilung a ven bakah leivung leh lung lian lutuk lo chu dang zo tura beisei a ni a. Tunah Mizorama vawikhat hmanna anih avangina daih rei zawng tur kum erawh an sawi thei loh thu Geology & Mining-a Geologist te chuan sawiin, Trial Stage-ah kan la awm mek tih an sawi. Ngaizel kham/kopang tuam nan hian Green Draping HDPE hi Roll 13 hman niin cheng nuai 19 sen a ni a. He Green Draping HDPE hi ADDMA (Aizawl District Disaster Management Authority) in a lei a ni.

Tunah hian Ngaizel kham-a tla Lung lian zualpui engemaw zat la awm te chu khawl (Rockbreaker) nena chhut keha thiarchhuah an ngaih dawn avangin kawng zau laiah hnawl tawm an ni a, thiarchhuah hna hi kalpui leh thuai turin PWD lam chuan hma a la mek zel a. Hnathawktu leh mipui te tan a him zawk nan Ngaizel kawng hi hun enge maw chen khar a nih hnuah August 14, 2026 tlai khan hawn leh a ni.

Nimin-a helai hmun a tlawhna ah hian PWD Minister Vanlalhlana chuan Ngaizel kham phei min thinin harsatna a thlen nasat thu sawiin, helai hian harsatna, chhiatna, In leh loh chânna leh mihring nunna hial chânna a lo thlen tawh thin thu a sawi a. Hemi sutkian nan hian sawrkarin theihtâwp a chhuah thu pawh sawiin, “Hmasawn zêl tum a ni a, cement-a phuhna shotcrete khawl hmanga nghet leh daihrei zawk tura tih tum a ni,” tiin sawrkar hmalakna te a tarlang bawk.