MZP-in ‘MPSC chhanchhuah hnatlang’ an nei

Mizo Zirlai Pawl (MZP) chuan nimin khan Aizawl-a MPSC pisa tual-ah ‘MPSC chhanchhuah hnatlang’ an ko a, Vawiin-ah pawh chhunzawm leh an tum a ni.

Nimin-a ‘MPSC Chhanchhuah hnatlang’ an neih ah hian MZP President Dr. C. Lalremruata chuan, MPSC Pisa tual-a an punkhawm chhan chu Mizo zirlai hna zawng mek ten MPSC laka an rinna a tlakhniam an hlauh vang a ni tih sawiin, MPSC chhanchhuah hnatlang an neih mekah MPSC hnuaia exam hmachhawn turte MPSC lamin an lo chhinchhiah dawn ni awm anga thu thang chu thu belhchian dawl lo a nih thu leh lo ni ta pawh nisela zirlaite thlavang an hauh tlat tur thu a sawi a, engmah hlauh nei lova Mizo thalaite he MPSC chhanchhuah hnatlang an neih mekah hian tel ve theuh tura an sawm thu a sawi bawk.

MZP hian niminpiah khan thutkhawm hmanhmawh neiin MPSC chhanchhuah hnatlang neih hi an rel a, hemi chungchanga thuchhuah an siamah MPSC hnuaia exam-a One Time Registration (OTR) aiah Need based in Specific Application form siam ni zawk se an duh thu te, OTR-a document upload kim loh avanga reject zawng zawngte Offline-a an document thehluhna hun siamsak tura an duh thu te bakah Written exam-a tling tawh, OTR-a document upload kim loh avanga reject tawh te tan pawh offline a document thehluhna hun siam sak ni tawh sela an duh thu te an sawi a. Heng bakah hian Mizoram Public Service Commission (MPSC) kalphung chu siam that vek an duh thu leh sawrkarin Reform Committee/Commission din rawh se tih te chu an thuchhuah siamah hian an tarlang tel bawk a ni.