MYC Chairman leh Taiwan Ambassador inkawm

New Delhi-a cham mek Mizoram Youth Commission (MYC) Chairman Malsawmzuala Ralte chu nimin khan Taiwan Ambassador Office-ah lengin Dr. Mumin Chen nen an inkawm a, India-Taiwan Labor Mobility Agreement 2024 hnuaia Mizo thalai Taiwan-a hnathawk tura tirh chungchanga hmalak ho mekna chu an sawidun a, Taiwan Ambassador Mumin chuan Taiwan-ah November thla khian Mid-Term Election a awm dawn avanga hmalakna a kal muan thu sawiin, theihtawpa kawng an dap zel thu a sawi a. Mizoram-a Kut rawn chhim paha Taiwan Company hrang hrang leh Taiwan Chamber of Commerce in India te rawn zin pui a, Mizo thalaite tana hnathawh theih tur remchang ngaihtuah ho nise a ti bawk. Hei bakah hian Taiwan Embassy-a Education changtu Jill Lai-i pawh kawmin Taiwan-a Mizo thalai lehkha zir duh leh Mandarin tawng zir duhte tan scholarship an neih thu a lo hrilh bakah Mizo thalai a tam thei angin chhawr tangkai se a duh thu a sawi bawk a ni.