Kumin-ah Serchhip District-a SCC kaltlangin Sawhthing kg. 26,61,652 hralhchhuah a ni
Kumin-ah hian Serchhip District-ah kum hmasa aiin Sawhthing man hi a tha deuh niin a lang a, Serchhip District-ah hian sawrkar in Sawhthing hralhna turin Secondary Collection Centre (SCC) hrang hrang 8 siamin heng SCC hrang hrangah hian Sawhthing hralh tur bag 73,869 dahluh a ni a, heng te hi hralhchhuah vek niin a vaiin kg. 26,61,652 hralhchhuah a ni a, hei hi Rs. 7,48,51,395 man a ni. Serchhip District-a SCC hrang hrangte zingah Thenzawl SCC atanga Sawhthing hralh hi tam berin bag 12,023 dahluh atangin kg. 4,86,881 hralhchhuah a ni a, hemi atanga sum hmuh chu Rs. 1,15,40,514 niin Sawhthing hralh tlem ber chu East Lungdar SCC a ni a, Sawhthing bag 5990 dahluh atangin kg. 2,08,809 hralhchhuah a ni a, an sum hmuh chu Rs. 82,24,090 a ni a. Kuthnathawktu ten Sawhthing hralh tur an dahluh tlemna ber SCC chu North Vanlaiphai SCC niin bag 4871 dahluh a ni a, heta tang hian kg. 3,58,216 hralh niin hemi atanga sum hmuh chu Rs. 84,26,895 a ni bawk a.
Tarlan tawh angin kumin hian Serchhip District-ah SCC tin te hian Sawhthing hralhna tur hi buaipuiin an hralhna rate pawh a hun leh hmun a zirin a inang lo nual a, hmun thenkhat ah a tir lamah tlawm te te a hralh a nih laiin a hnu lamah sawrkar tana Support Price pek ngai lo leh pek tam ngai lova hralh te pawh an awm bawk a. Hei vang hian kumin hian Sawh-thing hralhna atanga sum hmuh hi a inang lo nasa hle a, Support Price pek ngai te pawh tunkar hian pek kim tum a nih thu tunhnai khan Agriculture Minister in a sawi tawh a ni.