MPSC rintlak ni turin sawrkar in tan a la zui zel dawn tih Chief Minister in a sawi

Chief Minister Lalduhoma’n Mizoram Public Service Commission (MPSC) rintlak a ni turin sawrkarin tan an la zui zel dawn tih a sawi.
MPSC chungchangah hian Chief Minister chuan thuchah siamin, an sawrkar hnuah Mizoram Subordinate Service Selection Board thiatin MPSC kutah a tlak avang leh an sawrkar hnuaiah hnalak a tam em avangin MPSC phur a rit hle tih sawiin, tuna MPSC hna punna hi an sawrkar hnuah zaa 60 vel a tling niin a sawi a. MPSC-ah rinna nghah chhoh zel anih avangin Department-in an lo tih ve turah pawh a Department zawkten zawhna siam thlengin MPSC kutah an hnawh deuh ta zel nia sawiin, question paper endik leh result puan thlengin MPSC kuta dah duh an awm thu leh hei hian nasa takin tunhma a la khawih ngai loh hna thar chu MPSC chungah a awm belh tak zel thu a sawi a, thawktu indaihloh avangin an tih tur exam form endik te thlengin an ti hman lova, buaina a awm ta niin a sawi.

Chief Minister chuan MPSC rintlak a siam turin, thawktu indaihlohna mai bakah, hmanrua leh infrastructure dang te pawh tih changtlun chhoh zel a nih thu sawiin, budget pawh nasa taka tihpun a ni a, cheng nuai 1550 dah niin hei pawh hi ennawn leh tur a ni tih a sawi a. Thawktu dah belh an nih dan Chief Minister chuan sawiin, MSSSB thiah a nih hnuah a thawk thin mi 21 te chu MPSC-ah hian chhawm tir an nih thu leh Assistant 2 leh UDC 3 la tharin pakhat promotion pek an nih thu te, LDC 5 lak thar niin Group D-ah mi 5 lak thar an nih bakah PE atangin mi 2 te chu regularize an nih thu a sawi a. Tunhnai maiah Group D atanga Asst. Controller of Examination thleng Post 9 lak belh theihna sawrkar in a pek thar bakah an la indaihlo cheu a hriat a nih avangin an mamawh tur zirchian niin Post hrang hrang 25 an la mamawh dawn nia hriat a tnih thu a sawi a, sawrkar-ah dil belh mek a nih thu a sawi bawk.

Chief Minister chuan tunah hian Examination Hall thar tur cheng vbc. 100.92 man sak mek a nih thu sawiin, MPSC-ah beisei ang lo leh duhthusam ang lo thil a thleng a nih pawhin a tul ang zela siamthata action lak a tul a nih pawhin, action an la hreh dawn lo tih a sawi a, chutiang tur chuan tunah hian sawrkar a inpuahchah mek thu pawh a sawi bawk a ni.