All India Radio Aizawl kum 60 tlin lawmna Home Minister hovin neih a ni
AIR Aizawl kum 60 tlin lawmna ah hian Home Minister K. Sapdanga chuan AIR Aizawl chuan Mizo hnam zia leh tawng vawnhim kawngah tangkai takin hna a thawk thin tih sawiin, Mizo hnam nun vawng himtu pawimawh tak a nih thu a sawi a, Khawvel hmasawn zelah All India Radio chu hnam zia humhalhtu pakhat niin tunlai khawvel changkanna nena inher remin mipui tan a la ding reng tih a sawi a. Tunlai khawvel midang inngaihsak tawnna a tlem zel laiin AIR Aizawl chu Lungngai leh khawhar hnemtu pawimawh tak an nih thu pawh sawiin, programme an duan hrang hrangte chu hmun kilkhawr thlenga ngaihthlak anih avangin a tha zawnga mipui kaihruai theitu pawimawh tak an nih thu a sawi bawk.
Home Minister hian All India Radio (AIR) kum 60 tlin lawmna puala lungphum hawngin Diamond Jubilee Souvenir a tlangzarh bawk a, Souvenir-a Article ziaktu pathum – Vanneihtluanga, Ramhluna Hnamte leh Rozama Chawngthu te hnenah lawmpuina thilpek a hlan a. He hun hi All India Radio Director leh Mizoram Cluster Head, DR Lalropuia chuan kaihruaiin AIR Aizawl bultan dan a tarlang a, AIR Aizawl chu mipuiin thuthar an hriat theih nan leh an him tlan zawk theih nan rambuai hunlaia din a ni tih sawiin, Mipui thinlungah a hlutna a la ngai reng tih a sawi a, tunlai khawvel hmasawn zel rualin AIR in hma a sawn theih nan thawktute theihtawp chhuah turin a chah a ni.
All India Radio Aizawl hi July ni 31, 1966 khan Aizawl Tuikhuahtlang-a Medical Civil Surgeon Assam Type Quarter-ah bul tan a ni a, a din hunlai hi rambuai intan chhoh lai niin Mizoram chu Assam State hnuaia District a la ni a, All India Radio Aizawl hian Mizoram chanchina hun hrehawm lai ber leh hmasawnna a hmuh thlengin hun a lo tawmpui vek tawh a, hun hmasa lam atanga Mizo mipuite ngaihthlak duh hrang hrang leh pawimawh tak tak a puanchhuah thin chuan ngaihhlut a hlawhin hmun tinah Radio ngainatu an tam thin hle a ni. AIR Aizawl Station atang hian Mizo hla chi hrang hrang bakah Hmar, Lai, Mara, Chakma hla te kar tin hunbi neia tihchhuah thin niin hun bikah theuh an tawng ngeia puangtu (Announcer) hranpa an awm vek a ni. Khawvel hmasawn zelah thil thar tam tak awm mahse All India Radio hlutna hi ala ngai reng a, hmun tinah ngainatu leh ngaithlatu tam tak an la awm reng a ni.